Delmiro Prieto, presidente de Down Galicia, e Antonio López Díaz, Reitor da Universidade de Santiago de Compostela, asinaron esta mañá no edificio do Reitorado un convenio de colaboración que busca estreitar as súas relacións, xuntar esforzos e establecer normas amplas de actuación que canalicen e incrementen os seus contactos e colaboracións.
Deste xeito, o obxecto deste convenio é o establecemento dun marco de actuación para a colaboración entre a USC, en especial coa Facultade de Medicina e Odontoloxía pero sen excluír outros centros, departamentos e servizos da Universidade, e Down Galicia en actividades culturais, científicas, pedagóxicas, de investigación e outras que sexan de interese para as dúas partes.
Estas colaboracións poderán darse a través da execución de proxectos e programas de investigación e desenvolvemento; a través da cooperación en programas de formación de persoal investigador e técnico; do asesoramento mutuo en cuestións relacionadas coa actividade das dúas entidades; e da organización e execución de actividades comúns relacionadas coa promoción social da investigación, a docencia e o desenvolvemento tecnolóxico, entre outras.
No acto de sinatura estiveron presentes a vicerreitora de Comunicación, Cultura e Servizos, Mar Lorenzo Moledo; o decano da Facultade de Medicina e Odontoloxía, Julián Álvarez Escudero; o vicedecano deste centro, Jacobo Limeres; e o catedrático de Estomatoloxía Pedro Diz Dios.
Investigación sobre saúde oral
Actualmente, Down Galicia e a Universidade de Santiago de Compostela atópanse colaborando nun importante estudo de investigación sobre saúde oral.
Este estudo, dirixido polo catedrático de Estomatoloxía Pedro Diz, está centrado en evitar a aparición e/ou o avance das caries e da piorrea nas persoas coa síndrome de Down e na poboación en xeral.
E é que crese que as persoas coa síndrome de Down teñen unha bacteria na boca que axuda a previr a caries, polo que, de confirmarse esta hipótese, permitiría establecer as bases dun tratamento do que se beneficiaría toda a poboación.
