A Consellería de Economía, Emprego e Industria, a través da Secretaría Xeral de Emprego, financiou con 70.668€ a contratación de 4 persoas desempregadas durante o pasado exercicio 2018 para desempeñar postos de carácter técnico nos centros de traballo que a Federación Down Galicia ten nas cidades de Pontevedra e Vigo.
Mediante estas contratacións, todas elas a xornada parcial por un período de un ano, deuse cobertura a diferentes áreas e programas que conforman o Servizo de Promoción da Autonomía Persoal para persoas coa síndrome de Down e discapacidade intelectual (SEPAP). Nesta ocasión, os programas nos que traballaron os técnicos contratados foron “Comunicación e Inclusión Educativa” e “Participación Social e Vida Autónoma e Independente”.
O servizo de Promoción da Autonomía Persoal de Down Galicia céntrase en proporcionar ás persoas coa síndrome de Down e outras discapacidades intelectuais os recursos adecuados que permitan a súa participación na comunidade da forma máis autónoma e independente posible, mediante o fortalecemento dos seus propios recursos e o adestramento da súa autonomía persoal.
En definitiva, estas contratacións contribuíron a dar cobertura e apoio ás persoas usuarias da Federación, co obxectivo de mellorar a súa calidade de vida e acadar a súa verdadeira inclusión.
