O vindeiro 28 de abril, unhas cen mil persoas con discapacidade en España que estaban privadas do dereito de sufraxio poderán votar nas eleccións xerais. Isto é posible tras a recente modificación da Lei Electoral Xeneral, un cambio no que tiveron moito que ver Mar Caamaño, nai de Mara, e a avogada Lourdes González-Laganá, que levan desde 2015 reclamando nos tribunais este dereito fundamental para as persoas privadas do mesmo durante un proceso de incapacitación xudicial. Elas foron as primeiras en chegar coa súa reivindicación ao Tribunal Supremo, ao Constitucional e ata ao Tribunal Europeo de Dereitos Humanos de Estrasburgo. A Fundación Down Compostela quixo recoñecer este traballo en defensa dos dereitos das persoas con discapacidade, entregándolles o Premio Extraordinario Down Compostela.
Coincidindo coa celebración do Día Mundial da Síndrome de Down, a Fundación tamén entregará os VIII Premios Down Compostela á futbolista Verónica Boquete, á Escola Infantil Municipal de Meixonfrío e á empresa Universo Milonga’s por contribuír de forma significativa a integración social, educativa e laboral das persoas con trisomía 21 ou discapacidade intelectual.
A entrega dos galardóns farase efectiva o próximo día 20, na gala que se celebrará no Hostal dos Reis Católicos e no que as persoas coa síndrome de Down volverán ser as protagonistas, xa que eles serán as encargadas de presentar aos premiados e premiadas desta oitava edición e entregarlles a escultura que simboliza estes galardóns. O acto comezará ás 20.30 horas para conmemorar o Día Mundial da Síndrome de Down, que se celebra o 21 de marzo tras a decisión da ONU de dedicar o 21-3 ás persoas con Trisomía 21 desde o ano 2012.
PREMIADOS 2019
Empresa Universo Milonga’ s SL
Pola súa decidida aposta pola integración laboral das persoas coa síndrome de Down e discapacidade intelectual. Os irmáns José e Mariano Rivas, responsables da empresa, e o seu equipo puxeron a disposición das persoas usuarias dos programas da área de Formación e Emprego da Fundación Down Compostela todos os seus locais, para permitir a varios mozos e mozas formarse no ámbito da hostalería e a restauración, nunha contorna de traballo absolutamente favorable. Pero non só iso, se non que unha desas persoas incorporábase ao persoal en xullo de 2018, e en decembro ese contrato convertíase en indefinido.
Escola Infantil Municipal de Meixonfrío
Pola calidade do seu equipo docente e o seu compromiso por unha educación de calidade e inclusiva nas primeiras etapas. Saír da contorna máis próxima representa un reto para nenas e nenos e para as súas familias, pero é decisivo na vida para fomentar a socialización e a autonomía. A Escola Infantil de Meixonfrío traballa día a día por unha educación inclusiva e normalizadora, onde todos e todas teñen participación e presenza de forma igualitaria, baseándose no respecto e no xogo colaborativo. Silvia Raíces, mestra-directora, coordina un equipo de profesionais dunha enorme calidade humana e facilitador da identidade persoal de nenas e nenos.
Verónica Boquete González (Vero Boquete)
Polo seu altruísmo, a súa solidariedade e a súa visión para converter nunha realidade a ansiada alternativa do deporte para todos e todas. Desde o ano 2013, o campus de fútbol que organiza nosa máis internacional e destacada deportista reserva prazas para que nenas e nenos coa síndrome de Down e discapacidade intelectual da Fundación poidan aprender e gozar da práctica do fútbol nun ambiente totalmente normalizado. Os beneficios da práctica do deporte son indiscutibles para calquera persoa, e poder facelo nunha contorna absolutamente integradora e á beira dunha estrela do fútbol mundial non ten prezo. Este xesto fai aínda máis grande a Vero Boquete, que non só destaca pola súa calidade como deportista, senón sobre todo pola súa calidade como persoa.
Premio Extraordinario para Mar Caamaño e Lourdes González-Laganá
Cuxa loita nos tribunais en defensa dos dereitos fundamentais permitiu que en España cen mil persoas con discapacidade recuperasen o dereito ao voto. Un dereito que moitos poderán exercer por primeira vez o próximo 28 de abril. Mar, nai coraxe como poucas, e Lourdes, unha avogada experta na defensa dos dereitos das persoas, inician esta loita en 2015, cando á filla de Mar retíranlle o dereito ao voto nun proceso de incapacitación. Empeza aí unha titánica loita nos xulgados, que por primeira vez chega ao Tribunal Supremo, ao Constitucional, e ata o Tribunal Europeo de Dereitos Humanos. Co apoio do movemento asociativo e unha iniciativa lexislativa popular da Asemblea de Madrid, esta reivindicación serviu, dez anos despois de ratificar a Convención da ONU sobre os Dereitos das Persoas con Discapacidade, para modificar a Lei Electoral española e devolver o dereito ao voto a todas as persoas con discapacidade. O premio a Mar Caamaño e a Lourdes González- Laganá é máis que merecido.
O premio consistirá nunha escultura do artista compostelán Cándido Pazos feita especialmente para representar estes galardóns: unha man montada sobre unha base de cuarzo do Pico Sacro. “A man é a máxima expresión do ser humano”, sinala o artista, quen utilizou as cores corporativas da Fundación (azul, amarelo e gris) para esmaltar as pezas. Coas mans, Cándido Pazos pretende simbolizar o apoio que os premiados deron ás persoas coa síndrome de Down e a recompensa que recibiron por iso.
Premiados en edicións anteriores
Na primeira edición dos Premios Down Compostela, celebrada en 2012, foron galardoados o Concello de Santiago, a empresaria Sofía Cebro e Xullo Castro Marcote, director do Hostal dos Reis Católicos. En 2013, os II Premios Down Compostela foron entregados ao CIEP Pérez Viondi da Estrada, Pizza Móbil e BBVA. Os galardoados en 2014 foron María García Quintas, a Asociación Cultural Rosalía de Castro de Cacheiras (Teo), e a farmacéutica Keramat, situada en Milladoiro (Ames).
En 2015 recibiron os Premios Down Compostela o catedrático de Estomatoloxía da USC, Pedro Diz Dios, o Instituto As Fontiñas e Limpezas Salgado. En 2016 os galardoados foron o Concello de Rianxo, Leroy Merlín e José Antonio Rey. En 2017 foron entregados á ex directora do BBVA, Carmen Barbeito, o colexio Divino Mestre e a empresa XADE (que xestiona o Multiusos Fontes de Sar e Santa Isabel).
Os premios Down Compostela de 2018 recaeron no Colexio A nosa Señora do Rosario de Arzúa (colexio Atocha), a empresa Cafento, a directora do Centro Institucións Galicia de Caixabank, María Jesús García Piñeiro, e a voluntaria Malena González Barreiro.