A Conselleira de Política Social visita a sede de Down Compostela e Down Galicia
O Salón de Actos do Teatro Salesianos de Vigo acollerá o vindeiro 21 de marzo, a partir das 19:00 horas, os actos conmemorativos do Día Mundial da Síndrome de Down e do 30 aniversario da Asociación Down Vigo. Nesta edición entregaranse os VI Premios Down Galicia, co obxecto de recoñecer o labor a prol da promoción da autonomía e igualdade das persoas coa síndrome de Down, realizado tanto por institucións e entidades como por persoas particulares.
Acto conmemorativo
Neste Día Mundial, os representantes das xuntas directivas de Down Vigo e Down Galicia estarán acompañados, previsiblemente, polo presidente do Parlamento de Galicia, Miguel Ángel Santalices; polo alcalde de Vigo, Abel Caballero; polo Delegado do Estado para a Zona Franca de Vigo, David Regades; pola conselleira de Educación, Universidade e Formación Profesional, Carmen Pomar Tojo; e pola conselleira de Política Social, Fabiola García Martínez.
Pero unha vez máis, as verdadeiras protagonistas desta sinalada data serán as persoas coa síndrome de Down, que se farán cargo da presentación e desenvolvemento do acto e farán oír a súa voz a través da lectura do Manifesto pola Autonomía Persoal.
Serán as encargadas, ademais, de entregar os VI Premios Down Galicia, que nesta edición recaen na categoría de persoa individual en Marcos González, por visibilizar e promover a capacitación profesional das persoas usuarias de Down Vigo ofrecéndolles formación como baristas e participación en diversos campionatos rexionais, ademais de liderar iniciativas de índole solidaria en beneficio da entidade; e na categoría institucional na Fundación Celta Integra, por promover a práctica deportiva inclusiva das persoas coa síndrome de Down e discapacidade intelectual coa súa participación activa na Liga Genuine.
Este acto central incluirá tamén a actuación musical de Mario Rivergood e o espectáculo “A maxia de Xabi” para o desfrute de todo o público asistente.
A entrada a este evento será gratuíta.
Para consultar o programa do acto conmemorativo prema aquí.
Xornada matutina sobre inclusión educativa
Pero a conmemoración do Día Mundial da síndrome de Down non se cingue unicamente ó acto principal, senón que haberá outras actividades ao longo do día.
Deste xeito, durante a mañá do día 21 de marzo (11:00h), Down Vigo organizará unha xornada técnica sobre inclusión na educación superior na Sala de Conferencias de Afundación Vigo (Policarpo Sanz, 24-26).
Destacan nesta sesión as intervencións de Jesús Flórez, catedrático en Farmacoloxía e Presidente da Fundación Iberoamericana Down21, e de Lola Izuzquiza, doutora en Ciencias da Educación e directora da Cátedra de Patrocinio da Universidade Autónoma de Madrid.
O aforo está limitado a 120 persoas, polo que para poder asistir será necesario inscribirse enviando un correo electrónico a comunicaciondownvigo@gmail.com. O prazo para facelo remata o vindeiro 15 de marzo.
Máis información neste enlace.
Iluminación dos principais monumentos de Galicia
Un ano máis, os principais monumentos de Galicia tinguiranse de azul e amarelo para conmemorar o Día Mundial da síndrome de Down. Así, a Torre de Hércules na Coruña, a Cidade da Cultura en Santiago de Compostela, as Fontes da Rúa Aragón en Vigo, os concellos de Ferrol e Pontevedra, ou a Ponte Romana de Ourense, entre outros, iluminaranse o vindeiro 21 de marzo para dar visibilidade e concienciar á sociedade neste día tan destacado.
Nacións Unidas aprobou en novembro de 2011 a declaración do 21 de marzo como Día Mundial da síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.
Entradas relacionadas
