Teima e Xuntos asinan senllos convenios de colaboración coas administracións locais
Manuel Pérez Cabo, presidente de Down Pontevedra Xuntos, e Paula Legísima Casares, directora do Centro de Día Salma, asinaron a pasada semana dous convenios que permitirán a colaboración entre ambas entidades nos ámbitos do emprego e do envellecemento activo.
Con esta sinatura, ambas entidades queren destacar a importancia da inclusión do colectivo de persoas coa síndrome de Down e outras discapacidades intelectuais na sociedade da cal forman parte e apostar polo envellecemento activo como base dunha mellor calidade de vida para as persoas maiores.
Por unha banda, grazas ao primeiro dos convenios de colaboración e mediante o Programa de Emprego con Apoio de Down Pontevedra Xuntos, José Carlos Martínez Coello, usuario da entidade, comezará a mediados de marzo a facer prácticas no Centro de Día Salma. Durante un mes, con posibilidade de prórroga, desenvolverá tarefas de apoio no servizo de comedor do centro.
Con esta nova oportunidade laboral, xa son 16 as persoas integrantes da bolsa de emprego de Down Pontevedra Xuntos as que están ocupadas nestes momentos, ben sexa a través de contratacións (15) ou de prácticas laborais (1). Este convenio en prácticas súmase aos tres novos contratos e unha conversión a indefinido deste comezo de ano. Desta maneira, o 89% das persoas usuarias do servizo de Emprego con Apoio da entidade están a formar parte do mercado ordinario de traballo actualmente.
Por outra banda, o segundo dos convenios de colaboración recolle a cooperación entre ambas entidades no eido do envellecemento activo, traballando de xeito conxunto no Proxecto de Atención Integral ao Envellecemento de Xuntos. Unha das finalidades deste proxecto é a participación das persoas maiores coa síndrome de Down e outras discapacidades intelectuais usuarias da asociación en actividades da contorna comunitaria, como exposicións, teatro, cine, etc., favorecendo o seu desenvolvemento persoal.
Así, ao abeiro deste convenio, planificaranse actividades conxuntas co Centro de Día Salma coa fin de xerar momentos de encontro entre os diferentes colectivos que conforman a contorna comunitaria, establecendo deste xeito redes informais de apoio.
No programa de Formación para o emprego de Xuntos planifícanse ao longo do ano visitas a empresas coa finalidade de que as persoas usuarias participantes coñezan in situ diferentes perfís profesionais. Nesta ocasión foron xa dous os encontros realizados coa empresa Salma, onde lle explicaron aos mozos e mozas asistentes as diferentes tarefas que realizan as profesionais dentro deste sector.
Entradas relacionadas
