Unha moza coa síndrome de Down formarase como auxiliar administrativa na biblioteca municipal de Redondela
O Teatro Salesianos de Vigo foi o escenario escollido pola Federación Down Galicia e pola Asociación Down Vigo para conmemorar un novo Día Mundial da Síndrome de Down. Nun acto que mesturou unha parte lúdica e outra institucional, as persoas con trisomía 21 e outras discapacidades intelectuais foron as verdadeiras protagonistas, reclamando un ano máis os seus dereitos e defendendo a riqueza dunha sociedade diversa e plural.
“Todas as persoas temos os mesmos dereitos, polo que as persoas coa síndrome de Down e outras discapacidades intelectuais tamén queremos ser persoas autónomas e independentes, estudar, traballar, querer, divertirnos, relacionarnos, experimentar e decidir”, demandaron.
A persoa encargada de conducir este acto conmemorativo foi a coñecida presentadora Patricia Pérez, que estivo acompañada en todo momento por Miriam Rodríguez e Roberto Pereira, persoas usuarias de Down Vigo. Tamara Carballa, pola súa banda, foi a encargada de dar lectura ó Manifesto pola Autonomía Persoal, dando así voz a todo o colectivo e facendo fincapé en que as persoas coa síndrome de Down e outras discapacidades intelectuais queren o seu espazo, “que é o de todos, e ser considerados un cidadán ou cidadá máis nesta sociedade que tamén é a nosa”.
No acto tamén interviñeron a conselleira de Política Social, Fabiola García Martínez; a conselleira de Educación, Universidade e Formación Profesional, Carmen Pomar Tojo; o Delegado do Estado do Consorcio Zona Franca de Vigo, David Regades Fernández; o alcalde de Vigo, Abel Caballero; o presidente do Parlamento de Galicia, Miguel Ángel Santalices Vieira; a secretaria de Down Vigo, Sonia María Taboada González; e o presidente de Down Galicia, Delmiro Prieto González.
A benvida correu a cargo da secretaria de Down Vigo, que aproveitou a súa quenda de palabra para agradecer a asistencia de tódalas persoas asistentes. Sonia María Taboada deu a benvida ao evento agradecendo o labor de tódolos ex-presidentes da entidade durante os 30 anos de percorrido e sinalando que “os avances en materia de inclusión socio-laboral son mérito de todas as familias, profesionais e voluntarios, que puxeron o mellor de si mesmos todo este tempo”. Ademais, Taboada destacou que “estes actos serven de recoñecemento a todas as entidades que están presentes nas 7 cidades principais de Galicia, xa que sen a unión de todos non tería sido posible avanzar en materia de inclusión”.
O presidente de Down Galicia, pola súa parte, quixo comezar a súa intervención amosando a indignación de todo o movemento Down en Galicia ante a última instrución da Xunta Electoral Central, que permitirá a determinados membros de formacións políticas cuestionar nas mesas electorais as condicións do voto das persoas con discapacidade que consideren que non exercen o seu dereito libremente. Prieto deixou claro que “é intolerable que as persoas con discapacidade vexan cuestionada, unha vez máis, a súa capacidade de decisión”. Neste sentido, aproveitou a presenza institucional dos representantes autonómicos, provinciais e municipais para instar ás formacións políticas a que “soliciten aos apoderados e interventores dos seus partidos a non formar parte deste despropósito”. Así mesmo, o presidente da Federación non quixo esquecerse da importancia da inclusión no eido educativo “nun tempo no que volven alzarse voces a favor da educación segregada”.
Ademais das intervencións das autoridades presentes, as persoas asistentes a este acto puideron desfrutar dun vídeo conmemorativo dos 30 anos da asociación Down Vigo e das estupendas actuacións do artista Mario Rivergood e do Mago Xabi, que fixeron as delicias de todos os espectadores e espectadoras.
Durante esta gala solidaria, tamén tivo lugar a estrea do vídeo “Síndrome de Down. Guía rápida”, elaborado pola Federación Down Galicia con motivo deste Día Mundial da síndrome de Down e financiado pola Consellería de Educación, Universidade e Formación Profesional. A través dunha historia animada e sinxela, a Federación pretende achegar á sociedade a realidade desta alteración cromosómica (enlace vídeo: https://bit.ly/2ugTHxy).
Premios Down Galicia
Down Galicia entregou nesta ocasión os VI Premios Down Galicia, que teñen por obxecto recoñecer o labor a prol da promoción da autonomía e igualdade das persoas coa síndrome de Down, realizado tanto por institucións e entidades como por persoas particulares.
O premio na categoría institucional foille concedido á Fundación Celta Integra pola promoción da práctica deportiva inclusiva das persoas coa síndrome de Down e outras discapacidades intelectuais coa súa participación activa na Liga Genuine. Mentres, na categoría de persoa particular, o galardón foille concedido a Marcos González, por visibilizar e promover a capacitación profesional das persoas usuarias de Down Vigo ofrecéndolles formación como baristas, ademais de liderar iniciativas de índole solidaria en beneficio da entidade.
O premio consiste nun recoñecemento simbólico e na entrega dunha figura representativa da imaxe Down realizada polo artesán galego Fernando Porto.
Xornada sobre educación inclusiva
Pero os actos conmemorativos do Día Mundial da síndrome de Down non se cinguiron unicamente a esta gala solidaria, senón que deron comezo durante esta mañá coa organización dunha xornada técnica sobre inclusión na educación superior.
A Sala de Conferencias da sede de Afundación Vigo acolleu as intervencións de Jesús Flórez, catedrático en Farmacoloxía e Presidente da Fundación Iberoamericana Down21; Lola Izuzquiza, doutora en Ciencias da Educación e directora da Cátedra de Patrocinio da Universidade Autónoma de Madrid; e dúas alumnas dos programas Alida e Promentor.
Iluminación dos principais monumentos de Galicia
Os principais monumentos das sete grandes cidades de Galicia conmemorarán hoxe o Día Mundial da síndrome de Down. A Torre de Hércules, o Hostal dos Reis Católicos, o Pazo de Fonseca, a Cidade da Cultura, os concellos de Ferrol, Pontevedra, Lugo e Santiago de Compostela, as Fontes da Rúa Aragón en Vigo, os edificios das Deputacións de A Coruña, Lugo, Ourense e Pontevedra, ou a Ponte Romana de Ourense serán iluminados de azul e amarelo na tarde-noite deste xoves 21 de marzo.
Nacións Unidas aprobou en novembro de 2011 a declaración do 21 de marzo como Día Mundial da síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.
Outras iniciativas polo Día Mundial da síndrome de Down
Este ano, a maiores dos actos conmemorativos e a iluminación dos principais monumentos galegos, Down Galicia decidiu apostar por varias accións de visibilización simultáneas para intentar achegar a realidade da síndrome de Down a toda a sociedade.
Así, por un lado, a Federación e Renfe chegaron a un acordo de colaboración polo que a operadora ferroviaria colocou máis de 2.000 repousacabezas nos seus trens de Servizo Público de Galicia que están a circular polo Corredor Atlántico durante os días previos e posteriores á data.
Por outra banda, Down Galicia lanzou unha campaña de sensibilización en concellos e centros educativos baixo o lema “Tan diferentes como iguais”, coa que pretende poñer en valor o concepto da diferencia e dar visibilidade á idea de que ningunha persoa é igual a outra e que, precisamente, esa diferencia é a que nos enriquece como sociedade. Máis de 15 concellos galegos sumáronse a esta iniciativa mediante a difusión de información nas súas páxinas webs e redes sociais, a colocación de carteis informativos do Día Mundial da síndrome de Down ou a elaboración de pulseiras conmemorativas para repartir nos centros educativos da súa localidade.
Entradas relacionadas
