As entidades Down de Galicia tamén quixeron conmemorar o Día Mundial da síndrome de Down con numerosos actos reivindicativos e de sensibilización por toda a comunidade autónoma. Así, ademais do acto central da Federación e a Asociación Down Vigo, nas sete principais cidades de Galicia, persoas usuarias de todas as entidades membro da Federación Down Galicia quixeron saír á rúa a facer escoitar a súa voz.

Down Pontevedra Xuntos sumouse á conmemoración deste Día Mundial cunha campaña de visibilización consistente na colocación de pequenos carteis nas prazas máis representativas da cidade, así como outro cartel de gran tamaño no balcón do concello. Doutra banda, profesionais da entidade realizaron varias actividades de sensibilización: un contacontos inclusivo en diferentes colexios de educación primaria e a presentación da unidade didáctica “Síndrome de Down. En primeira persoa” en institutos.

Na cidade de Ferrol, Teima Down Ferrol organizou dúas accións de sensibilización nas que participaron persoas usuarias e profesionais da entidade, así como moitas das familias que conforman a mesma. A primeira hora da tarde, os membros da asociación recibiron ao alcalde da cidade, Jorge Suárez, e a concelleira de Benestar Social, Saínza Ruiz, que aproveitaron a data para entregar, de parte de toda a corporación, un agasallo a Teima polos seus 25 anos de traxectoria. Pola tarde, familias e persoas usuarias da entidade asistiron o acendido da casa consistorial coas cores representativas do movemento asociativo da síndrome de Down, azul e amarelo. Alí, deuse lectura a un texto sobre o “Camiño Teimudo” percorrido neste cuarto de século e colocouse a pegada simbólica do distintivo deste camiño na casa do concello como quilómetro 0.

As persoas usuarias de Down Lugo quixeron aproveitar o Día Mundial da Síndrome de Down para saír á rúa e dicir ben alto e ben claro que “o desenvolvemento dunha sociedade está baseado na diversidade”. Acompañados por representantes do Concello e da Deputación de Lugo, os membros da asociación fixeron un percorrido por todos os edificios iluminados de azul e amarelo en conmemoración deste día. Unha vez na Muralla de Lugo, unha representante da entidade leu o Manifesto pola promoción da autonomía persoal diante dos alí presentes.

A Fundación Down Compostela celebrou a súa tradicional gala anual, onde entregou os VIII Premios Down Compostela. Nesta ocasión, os galardoados foron Mar Caamaño e Lourdes González-Laganá, polo seu traballo en defensa dos dereitos das persoas con discapacidade, e a futbolista Verónica Boquete, a  Escola Infantil Municipal de Meixonfrío e a empresa Universo  Milonga’s por contribuír de forma significativa a integración social, educativa e laboral das persoas con trisomía 21 ou discapacidade intelectual.

Down Coruña organizou unha charla-coloquio no centro educativo Sagrado Corazón – Franciscanas. O acto consistiu nunha clase baixo a metodoloxía de aprendizaxe cooperativa co alumnado e as persoas usuarias de Down Coruña. A continuación, tivo lugar un coloquio no que persoas coa síndrome de Down explicaron ante os medios de comunicación como é a súa vida e os alumnos puideron realizar preguntas ao respecto. Doutra banda, a asociación impulsou a campaña #LaSuerteDeTenerte colocando un  photocall para publicar fotos cos seus socios e socias, profesionais, persoas voluntarias, empresas e institucións colaboradoras.

Por último, a entidade máis nova da Federación, Down Ourense, tamén quixo reivindicar a importancia dun día tan sinalado como é o Día Mundial da Síndrome de Down. Acompañados polo alcalde da cidade e a concelleira de Educación, representantes da entidade Down levaron a cabo dúas dinámicas de equipo entre o alumnado do Colexio Plurilingüe Divina Pastora (Franciscanas) que amosaron a importancia da inclusión social das persoas coa síndrome de Down e outras discapacidades intelectuais.