“As persoas con discapacidade intelectual teñen as mesmas necesidades de orientación académica e profesional que o resto”
A finais do pasado mes de marzo, Down Vigo e o Concello de Redondela asinaron un convenio de colaboración que ten por obxecto posibilitar a persoas usuarias da asociación a realización de prácticas formativas en calquera das dependencias municipais deste concello pontevedrés.
A primeira persoa en beneficiarse destas prácticas na administración local é Loira Fernández, unha moza coa síndrome de Down, que desempeñará tarefas de auxiliar administrativa durante este mes na Biblioteca Pública Valle Inclán.
Con este acordo, o goberno municipal contribúe á normalización e á inclusión socio-laboral das persoas coa síndrome de Down e outras discapacidades intelectuais e apoia o labor desenvolvido nos últimos anos polas entidades Down en Galicia.
Este convenio recolle tamén o compromiso por parte do Concello para que as persoas participantes nestas prácticas formativas acaden as habilidades sociolaborais necesarias para desempeñar posteriormente un posto de traballo con totais garantías.
A responsable da Concellería de Servizos Sociais, Carmen Amoedo, destacou “o compromiso do Concello cos colectivos sociais, traballando a favor da igualdade de oportunidades”, mentres que o alcalde redondelano salientou que “a posta en marcha de convenios como este fan realidade todo o traballo pola inclusión real”.
Entradas relacionadas
