Aberto o prazo para a solicitude de axudas do Ministerio de Educación para alumnado con necesidades específicas de apoio educativo
© Universidade de Vigo
Desde o pasado mes de febreiro, oito persoas usuarias da área de inclusión educativa de Down Pontevedra Xuntos inícianse na música na Facultade de Ciencias da Educación e do Deporte da Universidade de Vigo, no marco dun taller impulsado pola Vicerreitoría do Campus. Fano acompañadas por oito estudantes do grao en Educación Primaria desta facultade, que as titorizan e as guían polas diferentes actividades que propón a profesora de música Marlene Armentero.
Tomando como punto de partida o seu caderno Mi, re, do, un proxecto desenvolvido inicialmente para o ensino da música en idades temperás, Armenteiro, licenciada en Educación, na especialidade de Educación Musical, pola Universidad de La Habana, promoveu no obradoiro unha ensinanza da música combinada coas matemáticas, a lectura, a pintura ou a escritura. Estas actividades buscan traballar de forma transversal a memoria, a atención, a percepción e a comunicación a través de diferentes estratexias e sempre coa música como fío condutor.
Tocar instrumentos de percusión, a realización de ritmos corporais, exercicios de respiración, vocalización, entoación e canto e un primeiro achegamento aos elementos básicos da linguaxe musical centran boa parte dos contidos que integran este curso articulado en oito sesións.
A profesional de Xuntos Leticia Fernández, pon de relevo como nun taller de apenas dous meses, persoas “que non teñen estudos musicais sexan capaces de interiorizar tan ben os coñecementos impartidos”, así como “conseguir comunicarse e expresarse con tanta facilidade” valéndose da música.
O vicerreitor do campus, Jorge Soto, sinala que “a Universidade é un ámbito idóneo para achegar á cidadanía proxectos que teñen que ver coa inclusión e a igualdade, xa que esta é un compromiso da comunidade universitaria cun proxecto común”.
Nesta mesma liña, o profesor de Pedagoxía Musical de Ciencias da Educación de do Deporte, Marco Lucato, explica que lles gustaría “repetir esta iniciativa en próximos cursos articulándoa dunha maneira máis ampla, xa que se trata dunha experiencia interesante para o alumnado”.
Entradas relacionadas
