O pasado 22 de febreiro, o Consello de Ministros do Goberno de España declaraba oficialmente o 3 de maio de cada ano como Día Nacional en España da Convención Internacional sobre os Dereitos das Persoas con Discapacidade. Esta xornada ten como finalidade a contribución ao coñecemento e difusión desta Convención, así como a toma de conciencia por parte da cidadanía dos seus principios, valores e mandatos.
Hai xa máis de 12 anos que a Asemblea Xeral das Nacións Unidas aprobou este texto, un instrumento internacional de dereitos humanos destinado a protexer os dereitos e a dignidade das persoas con discapacidade. A través dos seus 50 artigos, a Convención recolle todos os dereitos das persoas con discapacidade en ámbitos como o civil, o social, ou de acceso á educación, saúde e emprego.
Este tratado xurídico, ratificado por España no ano 2008, supón a consagración do enfoque de dereitos deste colectivo e a consideración das persoas con discapacidade como suxeitos titulares de dereitos. É, polo tanto, de obrigado cumprimento para o Estado garantir que o exercicio dos mesmos sexa pleno e efectivo.
Aínda que é certo que se lograron grandes avances nos últimos anos, aínda seguen producíndose vulneracións aos dereitos máis fundamentais. Desde a súa ratificación no noso país, Down Galicia loita para que os principios incluídos neste texto sexan cumpridos na súa totalidade e se aseguren e respecten deste xeito os dereitos fundamentais das persoas con discapacidade.
Un vídeo para reivindicar a igualdade de dereitos
Para combater o descoñecemento xeneralizado que existe no noso país sobre este tratado internacional, a Federación Down Galicia lanza hoxe un vídeo reivindicativo centrado na importancia da construción dunha sociedade baseada na igualdade de dereitos para toda a súa cidadanía. A través desta peza audiovisual coñeceremos a experiencia e as demandas de Mar Vidal, membro de Down Galicia, e da súa familia neste eido.
A non discriminación, un dos principios básicos da Convención
A Convención e os seus artigos baséanse en oito principios reitores entre os que destacan o respecto da dignidade inherente, a autonomía individual e a independencia das persoas, a participación e inclusión plenas e efectivas na sociedade, o respecto pola diferenza, a igualdade de oportunidades, a accesibilidade, a igualdade entre o home e a muller, o respecto á evolución das facultades dos nenos e as nenas con discapacidade e a non discriminación.
Apelando a este último principio reitor, Down Galicia quere expresar a súa repulsa e condenar publicamente os comentarios aparecidos nas últimas semanas en varios medios de comunicación e redes sociais que inclúen contido ofensivo, vexatorio e denigrante sobre as persoas coa síndrome de Down e outros colectivos.
Educación inclusiva, un dereito fundamental
Nos últimos tempos, estase observando como varios sectores da sociedade están erguendo a súa voz apelando a unha educación segregada. Pero o dereito a unha educación inclusiva é un dos dereitos avalados pola Convención Internacional da ONU sobre os Dereitos das Persoas con Discapacidade, que no seu artigo 24 recoñece que “os Estados asegurarán un sistema de educación inclusivo a todos os niveis para as persoas con discapacidade”.
A Federación Down Galicia leva desde hai anos poñendo de manifesto que o sistema educativo español é discriminatorio coas persoas coa síndrome de Down e vulnera o establecido neste tratado internacional.
Unha vez máis, Down Galicia quere reivindicar a importancia da construción dun modelo educativo inclusivo baseado nos principios de calidade, equidade, flexibilidade e respecto á diversidade. Debemos ter presente que a sociedade da cal formamos parte é plural e esa realidade ha de ser a bandeira da educación. Polo tanto, debemos ter en conta que se se segrega ao alumnado, sexa cal sexa a causa, sobre todo nunha idade temperá, non estamos avanzando na construción dunha sociedade tolerante e respectuosa coa diferenza.
Ademais do dereito á educación inclusiva, a Convención recolle outros dereitos fundamentais como o dereito a vivir en forma independente, o dereito a formar unha familia, o dereito ao traballo e ao emprego libre, o dereito á saúde, os dereitos de participación ou o dereito de voto, entre outros.