Graduada a primeira promoción do proxecto de formación inclusiva ALIDA de Down Vigo e a Escola de Maxisterio
A Fundación Inocente Inocente vén de premiar o proxecto “Inclusión educativa de alumnado coa síndrome de Down e outras discapacidades intelectuais” que Down Galicia presentou á convocatoria 2019 de axudas a proxectos asistenciais da fundación privada.
A través desta achega, que ascende aos 15.000 euros, a Federación poderá facilitar a inclusión escolar de 144 persoas usuarias das súas entidades membro en 115 centros educativos de toda a xeografía galega.
O proxecto de inclusión educativa de Down Galicia ten como obxectivo principal mellorar a inclusión escolar do alumnado con discapacidade intelectual na escola ordinaria, potenciando ao máximo o seu desenvolvemento cognitivo, social e persoal.
Está demostrado que se se prestan os apoios axustados e necesarios, o alumnado con discapacidade pode rendibilizar perfectamente os seus anos de escolaridade. Polo tanto, é completamente necesaria unha colaboración estable entre centro educativo, familia e entidade Down, que mellore a calidade da inclusión e do proceso educativo procurando innovar, dinamizar e implementar fórmulas para que as persoas coa síndrome de Down e outras discapacidades intelectuais teñan presenza, participación e aprendizaxe na aula ordinaria e no centro educativo ao longo de todo o seu proceso educativo.
En definitiva, o fin último consiste na creación dunha escola para todos e todas, que acolla as diferenzas e que as utilice como elementos enriquecedores do currículo, sendo capaces desde os centros educativos de responder a un deseño universal para a aprendizaxe adecuando recursos e metodoloxías accesibles a todo o alumnado.
O acto oficial de entrega deste premio terá lugar o vindeiro 10 de maio no Espacio Fundación Telefónica de Madrid (Calle Fuencarral, 3).
Entradas relacionadas
