Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
A Xunta de Galicia, a través da Consellería de Economía, Emprego e Industria, facilitou a contratación na Federación Down Galicia de tres persoas desempregadas acollidas ó programa de Garantía Xuvenil. Esta axuda estivo cofinanciada nun 91,89% polo Fondo Social Europeo e a Iniciativa de Emprego Xuvenil, a través do Programa Operativo de Emprego Xuvenil.
A achega, que ascende aos 40.074,51€, empregouse para sufragar os custos salariais das tres persoas contratadas e a súa cotización á Seguridade Social a xornada completa durante 7 meses. As tres novas traballadoras da Federación desempeñaron as súas funcións nos centros de traballo que Down Galicia ten en Santiago de Compostela, Pontevedra e Vigo.
Por unha banda, as funcións da traballadora do centro de traballo de Santiago xiraron en torno á aplicación de dúas novas aplicacións de xestión de datos que axilizan e simplifican o tratamento e a xestión dos mesmos, permitindo utilizalos cos mellores resultados, tanto dende o punto de vista do servizo ás persoas usuarias, coma dende o propio funcionamento diario da entidade.
O principal obxectivo deste proxecto foi implantar estas aplicacións para ofrecer ás persoas implicadas nos procesos de inclusión das persoas con discapacidade unha ferramenta que facilitase e garantise unha atención de calidade na prestación do Servizo de Promoción de Autonomía Persoal que se ofrece ó longo de todo ou seu ciclo vital, así como xestionar o crédito de formación dos e das profesionais. Do mesmo xeito, tamén se pretendía facilitar a xestión administrativa da Federación e dos seus centros de traballo a través dun espazo que dese resposta ás necesidades existentes, contando cunha aplicación que xerase as consultas e informes precisos para cada actuación.
Por outra banda, as funcións das traballadoras dos centros de traballo de Pontevedra e Ferrol centráronse no apoio á coordinación autonómica das actuacións do servizo de envellecemento activo. O proxecto de envellecemento da Federación ten como obxectivo principal a promoción do envellecemento activo das persoas adultas coa síndrome de Down e outras discapacidades intelectuais, asegurándolles maiores oportunidades de incrementar, manter e actualizar aquelas competencias que fomenten a súa independencia e autonomía persoal.
Entradas relacionadas
