Down España organiza un ciclo de conferencias para familias de persoas coa síndrome de Down
Esta pasada fin de semana tivo lugar en Vigo o XIII Campionato Nacional de Baristas. Tres xornadas cheas de diferentes competicións profesionais que, por primeira vez, incluíron un campionato para persoas con discapacidade intelectual. Desta maneira, Fórum Café celebrou a primeira edición do Campionato Barista Down integrado na categoría profesional, onde mozos e mozas de Down Compostela e Down Vigo competiron ante a presenza de xuíces homologados.
O obxectivo, segundo palabras da organización, foi “dar visibilidade a este colectivo e formar a persoas coa síndrome de Down para facilitar a súa inserción no mercado laboral”. O Campionato de Baristas Down consistiu en tres premios, repartidos entre os dous equipos vindos da capital e a cidade olívica. Así, mentres o equipo de Down Compostela fíxose co Premio ao Mellor Espresso e ao Mellor Latte, o equipo de Down Vigo fixo o seu co Premio ao Mellor Combinado.
O Campionato de Baristas Down consistiu nun exercicio onde se tiveron que confeccionar catro espressos, dous cappucinos arte e dúas bebidas con ou sen alcol en 16 minutos de tempo. O equipo de Compostela estivo formado por Álex Lado, Dani López e Fran Fianza, coordinados por Enrique Salgueiro, barista profesional de Cafento. Mentres, o equipo de Vigo conformárono Roberto, Miriam e Andrea, coordinados por Marcos González, responsable de calidade de Delikia.
Entradas relacionadas
