O Camiño de Santiago é o motivo elixido este ano polo Grupo de teatro Down Compostela para representar a súa undécima obra, que estreará este venres, 7 de xuño, no Salón Teatro de Santiago a partir das 20.00 horas. O acceso é gratuíto ata completar aforo, polo que será necesario recoller previamente a entrada.

Dirixidos por Lucas Herrador, nesta obra participan 19 mozos e mozas con síndrome de Down e discapacidade intelectual, que representarán sobre o escenario diferentes motivacións que teñen os miles de peregrinos que todos os anos visitan a capital.

Os camiñantes chegan a Santiago “cun mal disimulado orgullo pintando na cara, a recompensa a tanto esforzo está a poucos pasos”, sinala Herrador cando se lle pregunta que lle motivou a escribir esta obra. “Pensando na motivación que tiveron persoas tan diversas para realizar unha actividade destas características, chego á conclusión de que as razóns son tantas como persoas percorren o Camiño de Santiago”, asegura o director.

“Nun ton xocoso”, Lucas tentou “dar un punto de vista sobre estas causas, que se repiten desde hai séculos, facendo que peregrinos de todo o orbe acudan ata a tumba do Apóstolo Santiago”. O humor e a ironía estarán tamén presentes nesta obra, na que os actores volverán implicar ao público como parte do espectáculo.

En 2017, o Grupo de Teatro Down Compostela conseguiu o Premio do Público na Mostra de Teatro de Rianxo, onde representou a obra ‘Arturo, Arthur, Artur’.

‘Todos vos camiños levan a Santiago’ é a undécima obra que representa o Grupo de Teatro Down Compostela, despois da posta en escena de ‘La mansión de José Cruz’ (2018); ‘Arturo, Arthur, Artur’ (Salón Teatro, 2017), ‘Búscame a ese tipo’ (Salón Teatro, 2016), ‘Solo ante la Peligros’ (Salón Teatro, 2015), ‘Alicia en el país de las maravillas’ (Auditorio de Galicia, 2009), ‘Esopo y sus fábulas’ (Sala Nasa, 2010), ‘Romeo y Julieta’ (Sala Nasa, 2011), ‘Fuenteovejuna’ (Salón Teatro, 2012), ‘Bodas de sangre’ (Salón Teatro y Casa de Cultura de Milladoiro, 2013) e ‘Las pruebas de Hércules’ (Salón Teatro y Casa de Cultura de Milladoiro, 2014).