O Movemento Down pide un esforzo a docentes e administracións para seguir avanzando cara a unha educación inclusiva
A Coruña acolle esta fin de semana o V Encontro Nacional de Mozos e Mozas Down España. Desde hoxe ata este domingo a cidade herculina reúne a máis dun centenar de persoas coa síndrome de Down e discapacidade intelectual vindas de toda a xeografía española para vivir unhas xornadas festivas, reflexivas e inclusivas grazas a este evento que organizan Down Coruña e a federación estatal.
Desta maneira, membros dunha ducia de entidades Down participarán xunto a familiares e amigos neste encontro que inclúe espazos de debate sobre temas demandados polos asistentes, o festival de música inclusivo Santa Xoaniña, roteiros turísticos polos puntos destacados da cidade ou unha cea de gala nun restaurante con estrela Michelin, entre outras actividades.
Día inaugural marcado por un festival aberto á cidade
Hoxe, venres 21, os e as participantes ao encontro serán recibidos pola organización nos puntos de encontro para coñecer máis detalladamente como se desenvolverá a fin de semana. Haberá tempo libre ademais para establecer as primeiras conversacións co resto de asistentes.
A pedra angular do día inaugural terá lugar coa chegada da noite. O Festival Santa Xoaniña marcará o momento de romper o xeo axuntando comida ao aire libre, música, baile e moita festa. Desde as 21:30 en O Parrote terán lugar os dous concertos que compoñen este festival, co grupo de rock Xerock da Guarda e a agrupación coruñesa de reggae Bush Doctors.
Unha xornada principal con menú completo
Mañá sábado, día principal do encontro, estará repleto de actividades. Así, os roteiros turísticos protagonizarán a mañá, dando a oportunidade de visitar a Torre de Hércules, o Monte de San Pedro, o Aquarium e o centro da cidade. Coa chegada do mediodía, ás 12:30, terá lugar a presentación da curtametraxe “ Descoñecidas” na Sede Afundación, cuxa entrada é libre.
Pola tarde serán os espazos de debate os que copen a atención dos e das asistentes. Os temas propostos por estes serán os protagonistas, abordando diferentes cuestións relacionadas coa vida adulta e independente.
Rematando a tarde haberá un espazo de peiteado e maquillaxe baixo o título “No me mires” para que os e as participantes se poñan a punto para a gran cea de gala que terá lugar inmediatamente despois. Será unha comida no restaurante Árbore da Veira, cunha estrela Michelin no seu haber, que terá como guinda unha sesión DJ.
Conclusións para poñer o punto final
Para pechar o encontro, o domingo terá lugar un acto de clausura. Nel poñeranse en común as conclusións e reflexións dos espazos de debate, ademais de despedir o evento e aos asistentes cun vídeo resumen do que deron de si as tres xornadas.
Entradas relacionadas
