Down Vigo e a empresa de automoción Magna Seating asinan un convenio de colaboración para facilitar a inclusión laboral do colectivo
O pasado venres tivo lugar o acto de gradación da primeira promoción do Programa ALIDA, un proxecto que desenvolven Down Vigo e a Escola Universitaria CEU de Maxisterio que ten como obxectivo o acceso de persoas con discapacidade intelectual á universidade, facilitando así unha vida autónoma a través de ferramentas de empregabilidade. O acto de gradación tivo lugar na sede de Afundación onde os xa 12 titulados da promoción obtiveron un diploma acreditativo.
Durante a entrega de diplomas, Julia Criado, coordinadora do programa, apuntou a importancia desta promoción pioneira en toda Galicia, que abre un camiño que xa quedará para outros estudantes. Pola súa banda, o alumnado pronunciou un discurso no que destacou “a importancia de que as persoas con síndrome de Down e diversidade funcional accedan a formacións superiores, con aulas inclusivas e formando parte activa da comunidade universitaria”.
Unha experiencia inclusiva
Desde o pasado curso, o alumnado asistente participou na vida diaria da Escola Universitaria CEU de Maxisterio, con formación en habilidades socio-laborais así como actividades inclusivas e de colaboración tales como unha obra de teatro ou diversos talleres para fomentar a creatividade e as habilidades manipulativas. As materias son impartidas por docentes voluntarios da Escola Universitaria CEU de Maxisterio e profesionais de Down Vigo, compartindo aula e actividades co resto de estudantes.
O Programa ALIDA está formado por dous cursos académicos, nos que se imparten materias como relacións laborais, xestión da información ou novas tecnoloxías. Toda a aprendizaxe consolídase cun período de prácticas nunha contorna laboral ordinaria, colaborando con empresas do sector administrativo.
Entradas relacionadas
