BBVA e Down Galicia organizan unha xornada científica para celebrar unha nova edición do seu programa de prácticas
Unha trintena de persoas usuarias de entidades Down en Galicia recibiron onte no Palacio de Congresos e Exposicións de Galicia en Santiago un diploma acreditativo da súa participación nalgún dos cinco proxectos de formación prelaboral levados a cabo durante o último ano pola Federación Down Galicia.
O acto, presidido pola conselleira de Política Social, Fabiola García, contou coa participación de persoas usuarias de 16 entidades do ámbito social, participantes das 27 accións formativas financiadas pola propia Consellería a través das subvencións destinadas para o desenvolvemento de proxectos de asesoramento e formación de persoas con discapacidade na Comunidade Autónoma de Galicia.
Nesta ocasión, a Federación levou a cabo cinco proxectos dos que puideron beneficiarse 130 persoas usuarias das distintas entidades Down de Galicia, e que contaron cun financiamento total de 113.662,69 € para a súa realización.
O primeiro deles centrouse na preparación de oposicións autonómicas e estatais e tivo como principal obxectivo garantir ás persoas participantes a adquisición e mellora das competencias necesarias para presentarse a un proceso de oposición e superalo con éxito.
O segundo tiña por obxecto mellorar a alfabetización e exercitar as habilidades instrumentais básicas das persoas participantes, o que lles permitirá unha maior competencia social á hora de desenvolverse de maneira autónoma en actividades da súa vida cotiá.
O terceiro proxecto tiña como obxectivo a estimulación cognitiva das persoas con síndrome de Down e/ou discapacidade intelectual, para mellorar e exercitar as funcións cognitivas nas persoas participantes como base para lograr unha mellora da autonomía, as habilidades prelaborais e da súa participación na comunidade.
Finalmente, o cuarto e quinto proxecto centrábanse na especialización formativa. Desta maneira, un estaba enfocado á adquisición de competencias no ámbito da restauración, mentres o outro faría o seu co perfil profesional de ordenanza.
A inserción laboral das persoas con discapacidade intelectual e síndrome de Down é un proceso complexo. Estes proxectos ofrecen aos seus participantes a oportunidade de adquirir coñecementos e ferramentas que lles permitan ter a posibilidade de dispoñer dun traballo fixo, mellorando así a súa calidade de vida.
Desde Down Galicia non queremos deixar de destacar que este tipo de convocatorias son un gran avance, pois permiten financiar proxectos formativos orientados á adquisición de formación prelaboral e de habilidades para o desenvolvemento de actividades na vida cotiá, permitindo deste xeito unha preparación para unha futura inserción socio-laboral.
Entradas relacionadas
