Down Compostela cede o testemuño a Asalsido Down Almería para acoller a organización do 19º Encontro de Familias e o 11º Encontro de irmáns e irmás coa síndrome de Down e discapacidade intelectual que terán lugar do 31 de outubro ao 3 de novembro deste ano na cidade andaluza.

Ambos eventos coordinados con Down España desenvolveranse conxuntamente. O prazo de preinscrición abrirase dentro dun mes, a inicios de setembro. A asignación de prazas farase por sorteo on-line entre todas as persoas preinscritas.

A cita deste ano inaugurarase no Auditorio municipal Maestro Padilla o 31 de outubro e transcorrerá nas instalacións da Universidade de Almería ata o 3 de novembro. A organización está a ultimar os detalles do programa, que ten previsto priorizar os espazos de debate e opinión das familias, atendendo ás demandas recollidas nas avaliacións do último encontro celebrado o ano pasado na capital de Galicia.

O prazo de preinscrición para ambos os encontros abrirao Down España a principios do mes de setembro e informará a través das súas canles (web, páxina de Facebook e perfil de Twitter oficiais) e de correo electrónico a antigos participantes, os pasos detallados a seguir para cumprimentar a preinscrición e o posterior pago.

Como noutras ocasións, as familias que queiran acudir á cita poderán preinscribirse a través dunha aplicación que estará dispoñible na web da federación estatal. Cada familia preinscrita recibirá un número.

Tras esta primeira fase de preinscrición, as prazas definitivas asignaranse a través dun sorteo on-line no que tomarán parte os números de todas as familias preinscritas. Este sorteo realizarase a finais de setembro. As familias que obteñan praza no sorteo terán entón un prazo de 5 días para realizar o pago de inscrición.

Este 19º Encontro de familias de persoas con síndrome de Down e discapacidade intelectual ten como obxectivos:

• Apoiar ás familias para debater como facer posible o respecto dos Dereitos e a vida independente dos seus fillos e fillas.
• Potenciar o debate, a vinculación e o intercambio de experiencias entre as persoas asistentes.
• Dar protagonismo ás persoas coa síndrome de Down e discapacidade intelectual e ás súas familias.
• Desfrutar e compartir momentos de lecer e tempo libre con outras familias para aumentar a cohesión entre o colectivo.