O prazo para participar no 19º Encontro de familias e o 11º Encontro de Irmáns e irmás de persoas coa síndrome de Down e discapacidade intelectual xa está aberto desde esta fin de semana e finalizará o 16 de setembro, ás 10:00 horas. Asalsido Down Almería colle o testemuño de Down Compostela e organiza o evento deste ano, que terá lugar do 31 de outubro ao 3 de novembro.

Ambos eventos, coordinados con Down España, desenvolveranse conxuntamente. A cita inaugurarase no Auditorio municipal Maestro Padilla o 31 de outubro e transcorrerá en instalacións da Universidad de Almería ata o 3 de novembro.

Tras esta primeira fase de preinscrición, as prazas definitivas asignaranse a través dun sorteo on-line no que tomarán parte os números de todas as familias prerexistradas. Este sorteo realizarase o 19 de setembro. As familias que obteñan praza no sorteo terán entón un prazo de 5 días para realizar o pago de inscrición.

Como realizar a preinscrición e pago

As e os interesados deberán realizar o proceso de preinscrición a través da web encuentrodefamiliasdown.com. Para encher o formulario, se a familia xa asistiu a algún dos encontros anteriores deberá acceder como ‘Familia rexistrada‘; en caso contrario, deberán entrar como ‘Familia non rexistrada’. As familias dispoñen dun documento de axuda para o proceso de preinscrición, onde se detallan os pasos para seguir.

As familias seleccionadas terán desde o 19 de setembro ata o 25 ás 12 horas para pagar, a través da aplicación, a cota correspondente mediante tarxeta de crédito e, desta forma, confirmar a súa inscrición. No caso de que haxa familias que non formalicen a inscrición pasado o prazo, procederase a contactar coas que estean na lista de espera, seguindo a orde establecida no sorteo.

Programa do encontro

Este 19º Encontro de familias de persoas coa síndrome de Down e discapacidade intelectual ten como obxectivos:

– Apoiar ás familias para debater como facer posible o respecto dos dereitos e a vida independente dos seus fillos e fillas.

– Potenciar o debate, a vinculación e o intercambio de experiencias entre as persoas asistentes.

– Dar protagonismo ás persoas coa síndrome de Down e discapacidade intelectual e ás súas familias.

– Gozar e compartir momentos de lecer e tempo libre con outras familias para aumentar a cohesión entre o colectivo.