A sede da Federación Down Galicia recibiu hoxe a visita de Luís Pernas Hermida, Director de Institucións do Banco Santander en Galicia, para facer entrega da partida de 5.000 euros coa que a Fundación Banco Santander vai apoiar as aulas interactivas para a estimulación cognitiva das entidades Down. Este financiamento é un recoñecemento de Santander Ayuda, unha convocatoria que apoia proxectos que contribúen a mellorar a calidade de vida de colectivos vulnerables.

“Aulas interactivas para a estimulación cognitiva de alumnos coa síndrome de Down” é o programa que obtivo este financiamento na 14ª edición da convocatoria. A misión do proxecto é mellorar o equipamento tecnolóxico das aulas interactivas das entidades de Down Galicia como ferramenta audiovisual optimizadora dos procesos de ensino-aprendizaxe e dos procesos de estimulación cognitiva das persoas coa síndrome de Down e/ou discapacidade intelectual.

Para iso, será fundamental esta axuda, que irá destinada a cubrir equipamento informático e tecnolóxico destinado ao proxecto. Este está dirixido principalmente a alumnos/as coa síndrome de Down e discapacidade intelectual membros do movemento Down Galicia escolarizados no sistema regrado, con idades comprendidas entre os 3 e 21 anos como norma xeral. Con este plan de mellora das aulas interactivas beneficiaranse 144 persoas con discapacidade intelectual e, de maneira indirecta, 432 familiares e 124 centros educativos.