Ante o arranque do novo curso escolar que vén de comezar, o Movemento Down, a través de Down España e Down Galicia, solicita un esforzo e presta o seu apoio a profesorado e demais profesionais do ámbito da educación, así como esixe ás administracións a achega de todos os medios posibles, para seguir avanzando cara a unha educación inclusiva.
Tras a volta ás aulas de miles de alumnos e alumnas con discapacidade en todo o país, comezan a chegar as primeiras voces de alarma de pais e nais que relatan unha carencia de apoios educativos e diferentes problemas que están a atopar para lograr a inclusión dos seus fillos e fillas coa síndrome de Down ou discapacidade intelectual.
Moitas familias alertan dunha inexistencia de apoios dentro e fóra das aulas, da falta de compromiso do profesorado, da aplicación dunha pedagoxía estandarizada sen axuste á realidade individual de cada alumno, da carencia de profesorado de apoio… En definitiva, da exclusión dos seus fillos con discapacidade no ámbito educativo.
A necesidade do compromiso de docentes e profesionais da educación
Por iso, desde o Movemento Down pídese ao profesorado e demais profesionais do ámbito da educación que somen esforzos e poñan toda a súa vontade para non deixar desatendido ou apartado a ningún alumno ou alumna pola súa discapacidade. Para Mateo San Segundo, presidente de Down España, que dedicou toda a súa vida á docencia, “non poderemos conseguir unha sociedade aberta, inclusiva e comprometida coa igualdade de oportunidades, se as familias de persoas con síndrome de Down e discapacidade intelectual seguen vivindo con temor e incerteza a inclusión dos seus fillos e fillas nas escolas ordinarias”.
Segundo explica San Segundo, “esta situación é o caldo de cultivo perfecto para que se sigan impoñendo respostas baseadas na separación e na segregación do alumnado en centros de educación especial, pensando equivocadamente que así estarán mellor atendidas. Pensar así é un fracaso, unha agresión ao dereito fundamental dos nenos e nenas a unha educación en igualdade e un atraso social ao que temos que facer fronte dunha vez por todas”.
A preocupante omisión de medios por parte das administracións
Alén diso, o Movemento Down é consciente de que este compromiso debe ir en paralelo ao das administracións públicas, pois a inclusión esixe uns recursos necesarios para que os centros educativos poidan prestar os apoios que necesitan todos os alumnos. Na actualidade, os devanditos medios son, a vista de todos os axentes educativos, insuficientes e pouco planificados.
Para o presidente de Down España, “son as persoas con discapacidade intelectual as que máis poñen a proba o funcionamento do noso sistema educativo, e por tanto o como lles atendemos reflicte un indicador da nosa mellora social. Canto mellor atendamos a diversidade nas nosas aulas, mellor estaremos a aumentar a calidade educativa do noso sistema escolar”.
Un camiño viable co esforzo de todas e todos
Doutra banda, cada día existe un maior número de centros educativos que non se conformaron e que están a implantar sistemas, metodoloxías e enfoques inclusivos na súa docencia, demostrando que si é posible avanzar se se traballa niso con esforzo e determinación. Estes centros enfocan o seu traballo en cada alumno/a e non na súa etiqueta diagnóstica, aumentando as súas expectativas respecto a o que pode facer todo o alumnado, e esforzándose por aumentar a súa formación e a súa calidade docente.
Segundo afirma o presidente de Down España, “as escolas inclusivas estarán máis preparadas para afrontar os desafíos do ensino nas próximas décadas. Quen non estea no cambio, quedará inexorablemente fóra del. Unha sociedade do século XXI esixe escolas que aspiren á formación integral do alumno/a, con independencia das súas características persoais, potenciando sempre as capacidades por encima das discapacidades e os déficit”.
