Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
O Comité de Representantes das Persoas con Discapacidade (CERMI) dirixiuse nos últimos días aos diferentes partidos políticos para que se comprometan a elevar a taxa de actividade das persoas con discapacidade. Para o organismo, do que forma parte a Federación Down Galicia, o desemprego segue sendo moi elevado entre as persoas con discapacidade, o que xera pobreza, exclusión social e falta de autonomía económica.
Tal e como defende o CERMI e as entidades Down, o modelo legal actual de impulso ao emprego está obsoleto, polo que se necesita unha nova Lei de Inclusión Laboral. Unha norma que sente as bases e reforce as políticas activas de emprego para as dúas próximas décadas e evite así a exclusión laboral do colectivo de persoas con discapacidade.
Neste sentido, o CERMI expón dotar de nova regulación normativa ampla, vigorosa e actualizada ao Emprego Con Apoio (ECA) como unha das modalidades de acceso laboral con máis potencial inclusivo. Ao mesmo tempo, pide fomentar a Formación Profesional Dual como mecanismo de acceso do emprego para as persoas con discapacidade, mellorando as súas capacidades profesionais para obter un emprego de calidade.
A organización, ademais, pon sobre a mesa outras importantes demandas:
– Prohibir que as empresas e entidades que incumpren a cota de reserva de postos de traballo para persoas con discapacidade poidan recibir subvencións
– Aprobar unha lei de impulso do emprendemento para persoas con discapacidade
– Obrigar a que as ferramentas dixitais das empresas sexan accesibles
Accesibilidade cognitiva e educación inclusiva
No ámbito da accesibilidade cognitiva, o CERMI urxe a aprobar unha lei que regule este punto e preserve os dereitos das persoas con discapacidade intelectual e do desenvolvemento á autonomía individual e á inclusión na comunidade, fomentando a elaboración de documentos relevantes en lectura fácil, entre outras medidas.
Por outra banda, no ámbito da educación e a formación das persoas con discapacidade, a organización subliña, do mesmo xeito que vén demandando Down Galicia, a relevancia de garantir o dereito á educación inclusiva con todos os apoios que requira cada estudante con discapacidade. Así mesmo, solicita a creación do Centro de Referencia Estatal Universidade/Discapacidade para favorecer o acceso das persoas con discapacidade á formación universitaria, que nos últimos anos veu incrementándose, unha tendencia que debe potenciarse.
Entradas relacionadas
