Grazas ao convenio asinado este luns entre o reitor da Universidade de Vigo, Manuel Reigosa, e o presidente de Down Vigo, José Manuel García Orois, os membros de Down Vigo poderán realizar prácticas profesionais nos organismos do campus. Ambos amosaron a súa satisfacción por acadar un acordo que lle permitirá aos beneficiarios deste programa de prácticas gañar experiencia no ámbito administrativo e noutros sectores vinculados aos servizos da UVigo.
A duración do convenio será de tres anos, prorrogable por períodos anuais, e agárdase que sente as bases para futuros acordos de colaboración. “A idea é continuar este convenio con outros acordos, pensando, por exemplo, na posibilidade de que se poidan facer prácticas de certas especialidades universitarias”, explicou García Orois.
O presidente de Down Vigo fixo fincapé en que nestes intres a asociación conta con máis de 70 persoas no programa de Emprego Con Apoio e o número de integrantes en programas de formación é tamén moi amplo. “Grazas a este convenio e a moitos outros, así como ao máis que meritorio traballo das persoas da Área de Emprego, estanse logrando resultados extraordinarios”, resaltando neste sentido, que na actualidade hai xa máis de medio cento de persoas traballando, “cos seus correspondentes contratos laborais, algúns incluso indefinidos”.
Prácticas dun mes e que poderán realizarse en diferentes servizos
As prácticas das e dos membros de Down Vigo na universidade serán dun mes de duración e realizaranse nas propias dependencias universitarias. A UVigo comprométese a designar unha persoa que actuará como coordinador do programa e que supervisará a correcta aprendizaxe das persoas beneficiarias e, pola súa banda, Down Vigo facilitará un preparador laboral que será o responsable de formar ao participante na realización das tarefas, desenvolver actividades de comunicación e adaptarse ao ámbito laboral.
Segundo explicou a vicerreitora de Captación de Alumnado, Estudantes e Extensión Universitaria, Natalia Caparrini, as prácticas levaranse a cabo no Servizo de Deportes, Biblioteca Central, Extensión Universitaria e no SIE -Servizo de Información ao Estudante-. “Hoxe imos realizar unha visita a estes servizos e, se vemos que encaixan, faríanas directamente aí e, se non é así, buscaremos outros postos que se adecúen mellor”, recalcou Caparrini.
A vicerreitora tamén explicou que nos respectivos servizos os alumnos e alumnas estarán titorizados, tanto por unha persoa da propia universidade como por outra de Down Vigo que será quen, “inicialmente”, os apoiará para afacerse coas características do seu novo posto ata que collan certa independencia para, xa logo, “realizarlle un seguimento cada dous ou tres días”, engadiron desde a asociación.
