Este martes presentouse en Madrid a nova campaña ‘Quen é Quen?’ de Down España, cuxo obxectivo é impulsar a educación inclusiva no noso país. Trátase dunha campaña moi emotiva coa que a federación estatal quere alertar sobre a necesidade de mellorar a educación dos nenos e nenas coa síndrome de Down nos colexios ordinarios. Moitos deles están a ser derivados a centros de educación especial ou acoden a colexios onde non reciben os apoios que necesitan, sendo vulnerado así o seu dereito a unha inclusión plena na sociedade, recollido na Convención dos Dereitos das Persoas con Discapacidade da ONU.
O acto de presentación tivo lugar no Colexio Cardeal Spínola de Madrid, un centro educativo pioneiro no modelo de educación inclusiva que acolle a nenos e nenas coa síndrome de Down nos diferentes niveis educativos. Ao mesmo acudiron o presidente de Down España, Mateo San Segundo; o director xeral de Fundación ONCE, José Luis Martínez Donoso; o director do Colexio Cardeal Spínola, Iván Benito; e o director creativo executivo da axencia Tiempo BBDO, Tomás Ferrándiz.
Segundo explicou Mateo San Segundo durante a presentación, a campaña ‘Quen é Quen’ así como o resto de accións que se levan a cabo en toda España para impulsar a educación inclusiva son realmente fundamentais, pois “sen unha educación deste tipo non é posible un futuro inclusivo para as persoas coa síndrome de Down”. “Calquera educación debe ser inclusiva, se non, non é educación”, engadiu.
Na mesma liña, Martínez Donoso explicou como as persoas con discapacidade continúan enfrontándose a barreiras que fan que a inclusión sexa un camiño longo, pero necesario. “A inclusión non é un camiño fácil, pero hai que seguir traballando”, apuntou o presidente de Fundación ONCE.
Pola súa banda, o director do centro no que se rodou a campaña asegurou que “a educación inclusiva está dentro do ideario do Colexio Cardeal Spínola, pois se basea en avais científicos”. “Os mellores profesionais en educación avalan este modelo e os innumerables beneficios desta aprendizaxe heteroxénea. Non existe alumnado con necesidades, senón colexios con barreiras. Hai que eliminalas. Os colexios temos que adaptarnos ao alumnado que temos e non ao revés”, explicou.
“A inclusión é un dereito de todos os nenos e nenas”
Ademais, o presidente de Down España fixo público o “Decálogo por unha educación inclusiva de Down España”, un documento que senta as bases dunha educación para todas as persoas e no que se recollen as demandas da Federación neste ámbito. Este decálogo recoñece que a educación inclusiva é un dereito e pide unha educación na que ninguén quede fóra, unha educación que cree sociedades inclusivas, de calidade, que permita que todos e todas progresen. Unha educación en positivo que ensine valores e sexa flexible, que prepare para a vida e permita a mellora constante dos centros e o seu profesorado.
A campaña conta coa colaboración de 50 televisións nacionais, autonómicas e locais: TVE1, La 2, Tele5, Antena 3, FDF, Cuatro, Divinity, Energy, BeMad, Telemadrid, Blaze, Castilla La Mancha TV, EiTB, Canal Extremadura, Lleida TV, Ceuta TV, RTV Canarias, RTCyL, 13 TV, RTV Murcia, Europa Press, EFE TV, Net TV Vocento, Canal 8 Jerez, 7 TV, Correo TV, TV Ferrol, Levante TV, Canal Rías Baixas, IB TV Mallorca, Aragón TV, PTV Córdoba, Canal Málaga, Antequera TV, Calamocha TV, la Tele TV, TV Local Graus, Canal 4 TV, Televisió D´Eivissa I Formentera, Popular TV, Onda Jerez, Soria TV, Localia Televigo, Huesca TV, Teleminho e Canal 25.