Fundación Ibercaja colabora co programa Emprego Con Apoio para a inserción laboral das personas coa síndrome de Down
Con motivo do Día Internacional das Persoas con Discapacidade, celebrado hoxe en todo o mundo, Down Galicia e as súas entidades membro participaron en diversos actos conmemorativos ao longo de todo o territorio galego.
Deste xeito, a Federación participou no organizado polo Comité de Entidades Representantes de Persoas con Discapacidade de Galicia (CERMI Galicia), do que forma parte, e pola Consellería de Política Social.
Neste acto, celebrado na Sede de Afundación de Santiago de Compostela, procedeuse á lectura do manifesto “SOS soidade. Eu tamén conto” e, a continuación, as persoas asistentes puideron desfrutar do vídeo conmemorativo do 20 aniversario do CERMI Galicia. Iker Sertucha, presidente da entidade, e Fabiola García, Conselleira de Política Social, pecharon o evento con senllas intervencións.
Campaña Baixo o mesmo paraugas
Varias entidades Down de Galicia participaron na campaña “Baixo o mesmo paraugas. Galicia pola diversidade”, que diferentes entidades sociais de toda Galicia levaron a cabo en toda a xeografía galega.
Down Compostela, Down Coruña, Down Lugo, Down Vigo, Down Ourense e Down Pontevedra “Xuntos” participaron nos actos celebrados nas súas respectivas cidades.
A acción de cooperación asociativa “Baixo o mesmo paraugas. Galicia pola diversidade” nace no ano 2016, a proposta de ASPACE Coruña e apoiada por un total de 24 asociacións, co fin de organizar un acto conxunto para conmemorar o Día Internacional das Persoas con Discapacidade.
En 2017 uníronse 19 entidades, en 2018 a cifra aumentou a 53 entidades e na edición de 2019 participaron 78 entidades sociais de todas as provincias de Galicia.
Exposición do Camiño Teimudo
Teima Down Ferrol organizou para este Día Internacional das Persoas con Discapacidade un acto vespertino no Ateneo Ferrolán. Alí programaron unha exposición fotográfica repasando a súa traxectoria dos últimos 25 anos e a intervención de varias persoas usuarias da entidade que compartirán as súas historias de vida.
Entradas relacionadas
