Un mozo e unha moza de Down Ourense realizan prácticas na Universidade de Vigo
A Asociación Down Ourense presentou esta mañá na Deputación Provincial o seu calendario solidario 2020, que se poderá adquirir a partir do día de hoxe en diversos puntos da cidade.
Nesta edición, a asociación contou coa colaboración da Deputación de Ourense e dos fotógrafos Alberte Paz, Brais Lorenzo e Agostiño Iglesias, que conseguiron captar en imaxes divertidos momentos de membros de Down Ourense en dependencias da administración autonómica. Deste xeito, mozos e mozas da entidade posaron en estancias tan impoñentes como o Teatro Principal, o Salón de Plenos ou o despacho do Presidente.
No acto de presentación do almanaque, que tivo lugar na Sala de Xuntas da Deputación, participaron a deputada provincial, Luz Doporto Real, e a presidenta da Asociación Down Ourense, Mara Prieto Fortes.
Mara Prieto destacou a importancia desta iniciativa e resaltou que “o calendario solidario supón para Down Ourense unha fonte de ingresos moi importante e é unha vía máis de visibilidade e protagonismo para as persoas coa síndrome de Down e outras discapacidades intelectuais”. Tamén quixo aproveitar que hoxe se celebra o Día Internacional das Persoas con Discapacidade “para recordar que, aínda que se lograron grandes avances na loita por protexer os dereitos e a dignidade das persoas con discapacidade nos últimos anos, aínda seguen a producirse vulneracións aos dereitos máis fundamentais”.
Este ano a tirada será de 800 exemplares: 400 calendarios de parede e 400 calendarios de mesa, sufragados na súa totalidade pola Deputación de Ourense. Todos eles terán un prezo de 5€ e os beneficios obtidos coa súa venda irán destinados integramente ós programas de promoción da autonomía persoal que se levan a cabo en Down Ourense e que, actualmente, dan servizo a 76 persoas coa síndrome de Down e outras discapacidades intelectuais e ás súas familias.
Aquelas persoas que así o desexen, poderán adquirir o seu calendario solidario na propia asociación e nas tendas Angelo Milano (R/ Paseo, 30) e Nuria Vidal (R/ Concordia, 12), así como no stand de venda situado no Centro Comercial Ponte Vella os días 13 e 14 de decembro.
Entradas relacionadas
