As persoas coa síndrome de Down reclaman os seus dereitos con motivo do Día Mundial desta alteración cromosómica
A Federación Down Galicia e a Consellería de Política Social veñen de asinar un convenio de colaboración mediante o que a administración autonómica contribúe ao financiamento das actuacións que a Federación desenvolveu durante o ano 2019 no eido do envellecemento activo.
Este acordo, que achega a Down Galicia cen mil euros (100.000€), ten por obxectivo a realización dun proxecto de evolución e necesidades no envellecemento das persoas coa síndrome de Down, que está a beneficiar a aqueles membros da Federación en etapa adulta que ben por signos biolóxicos, cognitivos, sociais e/ou persoais están no proceso de envellecemento.
De modo indirecto benefíciase ás familias das persoas usuarias e a unha serie de axentes sociais implicados nas actuacións do proxecto como centros de saúde, servizos de xerontoloxía e xeriatría, etc.
As actuacións desenvoltas durante o período de vixencia do convenio son:
- Revisión e actualización bibliográfica.
- Estudo de detección de necesidades das persoas adultas coa síndrome de Down a través de dúas vertentes:
- Valoración do envellecemento das persoas usuarias
- Aplicación de enquisas
- Análise de datos e das necesidades detectadas, a través do que se poderán extraer conclusións sobre temas como a idade na que se comezan a detectar os primeiros signos de deterioro cognitivo, relación entre envellecemento precoz e grao de discapacidade, relación entre envellecemento precoz e traxectoria de vida e relación entre necesidades detectadas polos diferentes grupos de interese.
- Elaboración e identificación dun mapa de necesidades.
- Establecemento de liñas de actuación e recursos de apoio.
Unha vez obtidas as primeiras conclusións do estudo, será imprescindible darlle unha continuidade a través da identificación dos recursos e apoios que se consideran necesarios para dar resposta á atención das necesidades detectadas e referidas ás persoas coa síndrome de Down.
A media da esperanza de vida das persoas coa síndrome de Down incrementouse de xeito significativo nos últimos anos, chegando incluso a superar os 60 anos. Os estudos amosan que as persoas con esta síndrome teñen un envellecemento prematuro e máis probabilidade de que este sexa patolóxico. Por iso é necesario traballar en torno ao envellecemento activo do colectivo e á súa participación en recursos comunitarios para maiores. Por outra banda, tamén é fundamental avanzar no coñecemento das persoas maiores coa síndrome e Down e das súas particularidades, favorecendo así unha mellor e máis axustada atención.
Entradas relacionadas
