Deporte e medio ambiente no comezo do verán de Down Coruña
Coincidindo coa conmemoración do seu 20 aniversario este ano 2020, Down Coruña acaba de poñer á venda o seu primeiro calendario solidario. Con esta iniciativa, a entidade busca achegar á sociedade ás persoas coa síndrome de Down e outras discapacidades intelectuais e sensibilizar sobre os conceptos de diversidade e inclusión.
Para ilustrar os doce meses do ano, Down Coruña utilizou algunhas das fotografías da serie “Bailando bajo la lluvia” realizadas pola fotógrafa Ana Amado. Estas instantáneas, protagonizadas por mozos e mozas da asociación, foron finalistas nos Sony World Photography Awards de Londres en 2018.
Manuel Álvarez Esmorís, presidente de Down Coruña, destaca que “este calendario pretende, principalmente, a divulgación e que as persoas que o compren teñan presente durante todo o ano ás persoas coa síndrome de Down”.
Os beneficios obtidos coa venda dos almanaques, que teñen un prezo de 10€, irán destinados integramente aos programas de promoción da autonomía persoal que levan a cabo en Down Coruña e que, actualmente, dan servizo a 108 persoas coa síndrome de Down e outras discapacidades intelectuais e ás súas familias.
En palabras de Álvarez Esmorís, “a súa compra é un donativo á entidade co que levas un calendario de agasallo”.
O calendario pode adquirirse desde inicios deste mes nos dous centros que El Corte Inglés ten na cidade da Coruña (Centro Comercial Marineda City e Rúa Ramón y Cajal) e tamén na tenda Fnac de Praza de Lugo.
Entradas relacionadas
