Fundación Ibercaja colabora co programa Emprego Con Apoio para a inserción laboral das personas coa síndrome de Down
A Fundación Once, a través da convocatoria xeral 2018 de axudas económicas no marco operativo de inclusión social e economía social 2014-2020, continúa apoiando o proxecto “Talento profesional de persoas coa síndrome de Down e/ou discapacidade intelectual” que Down Galicia leva a cabo na comunidade autónoma. Esta achega está cofinanciada polo Fondo Social Europeo dentro do seu obxectivo temático 9: “Promover a igualdade, a saúde e a inclusión social”.
Desta forma, persoas usuarias da Federación e as súas entidades membro poden contar cunha serie de apoios dirixidos a conseguir a súa inclusión no mercado laboral ordinario.
En virtude desta achega, que neste período 2018-2019 foi de 36.000€, un total de 24 persoas coa síndrome de Down e outras discapacidades intelectuais contaron con algún apoio para a procura activa de emprego, mentres que outras 17 persoas tivérono para o mantemento do seu posto de traballo en empresas ordinarias.
Durante este período, persoas usuarias do proxecto en procura activa de emprego asinaron 17 convenios de prácticas, sendo varias as que realizaron máis dun período de prácticas en empresas diferentes ou mesmo na mesma.
En canto ás contratacións, 24 persoas asinaron un total de 33 contratos, incluíndo varias prórrogas. Practicamente a totalidade destas contratacións son temporais e a tempo parcial, o que dificulta a consecución dunha estabilidade laboral e un proxecto de vida.
Ademais, durante este período, realizáronse labores de prospección en empresas de toda Galicia co obxectivo de lograr unha oportunidade laboral para algunha das persoas destinatarias deste proxecto en fase de procura de emprego, pero tamén para conseguir a continuidade no posto dalgunhas das persoas usuarias en fase de mantemento.
Este proxecto levouse a cabo practicamente en toda a xeografía galega, especialmente nas capitais de provincia e nas súas cidades máis importantes, aínda que tamén noutros concellos aos que pertencen as persoas participantes no mesmo como Boqueixón, Oleiros, Arteixo, Ferrol, Lobeira, Arnoia, Cariño, Cotobade, Vigo, Baiona, Tomiño, Moaña, Cuntis e Salcedo.
Desde o ano 2002, as entidades Down en Galicia desenvolven o programa Emprego con Apoio, deseñado para atender especificamente as necesidades e barreiras que as persoas coa síndrome de Down e/ou discapacidade intelectual atopan á hora de tentar acceder ao mercado laboral ordinario.
Entradas relacionadas
