Desde hai xa varios anos, son moitas as empresas da cidade de Pontevedra e da súa comarca que confían no programa de Emprego con Apoio de Down Pontevedra “Xuntos”. Un claro exemplo é Distribuciones Froiz, que desde os inicios do programa no ano 2002, contrata ano tras ano a dúas persoas da bolsa de emprego da entidade para a campaña de Nadal.
Durante o último mes, Diego Fontenla e Helga García traballaron como mozos de almacén na empresa, elaborando caixas e cestas de Nadal. Ambos estiveron contratados a xornada parcial e desenvolveron a súas tarefas de luns a venres en horario de mañá.
Esta non era a primeira vez neste posto para Diego, que repite experiencia en Distribuciones Froiz. Como en anos anteriores, durante o mes que durou o contrato, desprazouse diariamente en autobús desde Cuntis para levar a cabo o seu traballo.
Pola súa parte, Helga combinou este contrato temporal co seu traballo indefinido como persoal de limpeza na entidade Arela.
Balance anual do programa de emprego de Xuntos
Desde hai xa algúns anos, a bolsa de emprego de Down Pontevedra “Xuntos” está sendo sinónimo de eficacia e é que a totalidade dos seus membros estiveron activos nalgún momento do ano, ben traballando ou ben desenvolvendo unhas prácticas laborais para mellorar as súas habilidades de cara a unha futura inserción máis estable.
O ano que está a punto de rematar amosouse especialmente produtivo en canto a contratacións. 18 das 19 persoas usuarias do programa de Emprego con Apoio da entidade contaron cun contrato de traballo en 2019. Ademais, asináronse 5 conversións a indefinidos e 1 prórroga.
Pero as inquedanzas das persoas integrantes da bolsa de emprego de Xuntos non quedan satisfeitas coa sinatura dun contrato. É por iso que 13 delas están a preparar oposicións na entidade, algunhas de xeito simultáneo ao desempeño dos seus traballos.
Por outra banda, é salientable ó número de empresas colaboradoras neste 2019, sumando nesta ocasión 23 colaboracións.
O programa de Emprego con Apoio
Desde o ano 2002, as entidades Down en Galicia desenvolven o servizo de Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos seus compañeiros e compañeiras de traballo e na mediación na relación con eles para que se desenvolva de xeito positivo e natural.
O acceso en igualdade de condicións a un posto de traballo segue a ser un dos grandes retos das entidades que traballan a prol da inclusión laboral das persoas con discapacidade. A participación e a cada vez maior presenza das persoas con discapacidade intelectual nas empresas ordinarias contribúe de xeito eficaz a desterrar os tópicos que tradicionalmente se atribúen a este colectivo, resultando un xeito sumamente eficaz de inclusión social.
