Down España pide ao Ministerio de Dereitos Sociais que non recorte as axudas ao Terceiro Sector nun momento de extrema vulnerabilidade
Down España celebra a constitución dun novo Goberno en España e a existencia dunha vicepresidencia social que permita que a discapacidade poida chegar a ser unha política prioritaria. Nesta liña, a federación estatal pide que se expoñan varias accións prioritarias que amosen un maior compromiso coas persoas coa síndrome de Down do noso país.
Principalmente, solicitan ao novo Executivo que desenvolva decididamente o cambio necesario na Lei de Educación para que comece a súa transformación cara a un sistema escolar de tipo inclusivo, xa que se pode construír unha escola en igualdade que atenda con eficacia e calidade ás persoas con síndrome de Down do noso país. Para iso, o compromiso político é fundamental.
Doutra banda, consideran necesaria a mellora e a regulación, a extensión e o apoio económico ao Emprego con Apoio (inserción laboral de persoas con discapacidade en contorna ordinaria), evitando así as limitacións que leva consigo a inserción laboral en contornas protexidas e segregadas (centros especiais de emprego). Ata hoxe, este foi o modelo prioritario para a atención laboral ás persoas coa síndrome de Down en España, e en tres décadas, só se conseguiu que unha minoría delas exerzan un traballo. É posible cambiar esta realidade e conseguir que unha maioría dos mozos e mozas adultas coa síndrome de Down teñan un papel laboral activo.
Down España solicita tamén que se empece a dedicar financiamento e recursos á investigación da síndrome de Down no noso país (Alzheimer, cancro, enfermidades autoinmunes,…) e deixar así de ser un dos países desenvoltos con mellor calidade e esperanza de vida das persoas coa síndrome de Down e con menor financiamento orientado á investigación desta discapacidade.
Por último, e tendo en conta que as mulleres con discapacidade sofren unha dobre discriminación (unha por ser muller e outra pola súa condición), o Goberno debe traballar en eliminar a devandita realidade a través de medidas e políticas que fomenten a verdadeira inclusión das mulleres coa síndrome de Down.
Down España considera básicas estas liñas de actuación para seguir avanzando na inclusión das persoas coa síndrome de Down do noso país en todos os ámbitos e etapas das súas vidas, así como para garantir os seus dereitos e os das súas familias. Por iso, póñense ao dispor do novo Goberno para traballar xuntos naquelas políticas que avalen e apoien unha mellora da calidade de vida das persoas que forman parte do colectivo.
Entradas relacionadas
