BBVA colabora na promoción da vida autónoma e independente das persoas coa síndrome de Down
Down Lugo empeza o 2020 reivindicando a autonomía das persoas coa síndrome de Down e outras discapacidades intelectuais. Faino a través do seu Programa de Vida Independente, no que actualmente participan 31 persoas pertencentes á asociación.
A vida independente é un dereito fundamental para calquera persoa e é por iso que se debe permitir ás persoas con diversidade funcional gozar dela. Desde este programa dáselles a oportunidade de vivir unha experiencia de emancipación temporal, ofrecéndolles formación, orientación e apoio e fomentando as súas habilidades e capacidades para que leven unha vida independente, autónoma e autoxestionada.
Todas as persoas que forman parte do programa contan con unha hora semanal dedicada a preparar aspectos relacionados coa vida independente: alimentación saudable, hábitos de hixiene, control de gastos, rutinas horarias, etc. Ademais, ao longo do ano gozan de tres estancias na vivenda que ten a asociación, que se organizan atendendo ao seu nivel de autonomía, á súa idade e a se se atopan ou non escolarizadas. Deste xeito, existen tres modalidades diferentes:
- Fin de semana: de venres pola tarde a domingo pola tarde.
- Tres días por semana: de mércores ao mediodía a venres pola tarde.
- Semana completa: de luns a venres.
Durante estas estancias, as persoas participantes son as encargadas de realizar as tarefas domésticas, planificar o menú semanal, xestionar o seu tempo, utilizar os recursos comunitarios (bus urbano, supermercado, cafetería, biblioteca, etc.), á vez que se lle dá especial importancia á convivencia e á creación de relacións sociais. A cantidade de apoios prestados polos e polas profesionais varía en función das súas necesidades e das características do grupo.
A pasada semana deu comezo o primeiro período de estancias deste 2020, que se alongará ata o mes de abril. De abril a xuño terá lugar o segundo período e o terceiro, e último, será no mes de setembro.
Entradas relacionadas
