Down Galicia e Política Social asinan un novo convenio para o financiamento das actividades, programas e servizos da Federación
A través das subvencións destinadas á realización de programas de interese xeral para fins de carácter social con cargo á asignación tributaria do 0,7% do Imposto sobre a renda das persoas físicas (IRPF), a Consellería de Política Social financia parte dos programas de familias e envellecemento que Down Galicia leva a cabo en todo o territorio galego, así como parte das inversións en equipamento e acondicionamento dos centros de traballo da Federación.
Desta forma, o “Programa Autonómico de Apoio a Familias de Persoas coa síndrome de Down e outras discapacidades intelectuais” e o “Programa Autonómico de Apoio e Intervención no proceso de envellecemento de persoas coa síndrome de Down e outras discapacidades intelectuais” contan con sendas contribucións de 55.844,00€ e 53.186,77€, respectivamente.
Gracias á primeira das achegas, preto de 700 familias de máis de 100 concellos de toda Galicia beneficiáronse durante o ano 2019 das diversas actuacións levadas a cabo ao abeiro deste proxecto: información e orientación, formación continuada, apoio especializado, respiro familiar, coordinación autonómica, etc.
A intervención no ámbito familiar é prioritaria para a Federación Down Galicia ao entender que a familia é o activo máis importante para as persoas coa síndrome de Down e outras discapacidades intelectuais. O seu obxectivo é a busca o equilibrio e a creación dun clima afectivo relaxado e normalizado que contribúa ao adecuado desenvolvemento da persoa usuaria.
Por outra banda, o programa de envellecemento, que en 2019 beneficiou a 94 persoas usuarias, ten por obxectivo principal promover o envellecemento activo nas persoas adultas dependentes coa síndrome de Down ou outra discapacidade intelectual, asegurándolles maiores oportunidades de incrementar, manter e actualizar aquelas competencias que fomenten a súa calidade de vida.
Así mesmo, a Federación Down Galicia contou cunha achega total de 43.310,58€ para levar a cabo varios proxectos de adquisición de equipamento para os seus centros de traballo e varias obras de acondicionamento nas propias entidades membro. Deste xeito, Down Lugo comezou as obras de ampliación e acondicionamento do seu novo local, Teima Down Ferrol mellorou a iluminación das súas instalacións e Down Coruña acondicionou unha das súas salas de traballo. Down Vigo, Down Pontevedra Xuntos e Down Compostela adquiriron equipamento informático para o Servizo de Promoción da Autonomía Persoal, mentres que a Federación renovou o seu equipamento tecnolóxico para continuar levando a cabo o seu traballo diario.
Entradas relacionadas
