A Federación Down Galicia recibiu o apoio da entidade financeira Bankia, por importe de 4.550 euros, para o seu programa ‘Unha escola para  tod@s: inclusión educativa de alumnado coa síndrome de Down e outras discapacidades intelectuais’, recoñecendo así a importancia da educación inclusiva para o alumnado pertencente a este colectivo.

O proxecto, que beneficia na actualidade a case 150 persoas pertencentes a entidades Down de Galicia, aposta pola inclusión de nenos, nenas e adolescentes coa síndrome de Down ou outra discapacidade intelectual na escola ordinaria a través do desenvolvemento cognitivo e un traballo sistémico cos centros educativos, o alumnado e as súas familias.

A achega de Bankia enmárcase no seu programa ‘Red Solidaria’, polo que as súas oficinas apoian un proxecto social próximo, que elixen no principio do ano, se logran alcanzar os seus obxectivos de negocio no conxunto do exercicio.

No ano 2019, un total de 250 proxectos recibiron apoio económico por máis de 1,25 millóns de euros grazas ao programa do banco, o que favoreceu a máis de 81.000 persoas en todo o ámbito nacional.

‘Red Solidaria’
O programa ‘Red Solidaria’ iniciouse en 2013 e, desde entón, trata de recoñecer o esforzo dos empregados no logro de obxectivos de negocio a través do apoio de proxectos sociais próximos, propostos polos propios empregados, co obxectivo de que a acción social do banco se desenvolva nas localidades onde está presente. Deste xeito, a entidade apoia ás asociacións, fundacións e ONG que desenvolven programas de acción social nestas zonas e que xeran un impacto local perceptible polos seus clientes e empregados.