Down Galicia e as súas entidades membro nesa provincia contaron un ano máis coa colaboración da Deputación da Coruña que, mediante unha achega económica de 16.956,67 €, apoia o proxecto “Emprego con Apoio de persoas coa síndrome de Down e/ou discapacidade intelectual na Coruña”.
Grazas a esta axuda, puideron desenvolverse diversas actuacións no ámbito da inserción laboral na empresa ordinaria que beneficiaron a un total de 95 mozos e mozas con síndrome de Down e outras discapacidades intelectuais. A totalidade destas persoas forman parte da bolsa de emprego do servizo de Emprego con Apoio das entidades membro de Down Galicia da provincia da Coruña.
En virtude desta colaboración, durante o período no que se desenvolveu este proxecto, asináronse 21 convenios de prácticas e houbo 70 contratos de traballo vixentes, dos que a gran maioría foron a xornada parcial e de duración determinada.
Con respecto ó traballo de prospección, durante o pasado ano conseguiuse visitar e presentar o proxecto a un total de 60 empresas. O obxectivo destas visitas centrouse en atopar un posto de traballo susceptible de ser ocupado por aquelas persoas participantes que estiveron en situación de busca de emprego nalgún momento do proxecto, ou ben para negociar posibles renovacións ou prórrogas de persoas usuarias ocupadas.
Colaboración na optimización dos recursos tecnolóxicos da Federación
A Deputación da Coruña tamén destinou o pasado ano 2.886 € ao proxecto de optimización e renovación do equipamento tecnolóxico para a xestión do Servizo de Promoción da Autonomía Persoal que levan a cabo Down Galicia e as súas entidades na provincia. Esta achega financiou parte da instalación dun servidor central de alta capacidade perfectamente configurado para o arquivo de datos e aplicacións de xestión da información.
Deste xeito, a pesar de que o servidor se instalou na sede central de Down Galicia en Santiago de Compostela, deu servizo a todos os centros de traballo da Federación da provincia de A Coruña, polo que o impacto deste investimento foi máis aló que o da propia Federación.
