Down Galicia contrata a tres persoas desempregadas a través do Programa de Garantía Xuvenil
Mediante unha achega de 15.000 euros, a Fundación Inocente Inocente colaborou durante o pasado curso escolar co proxecto de Down Galicia “Inclusión educativa de alumnado coa síndrome de Down e outras discapacidades intelectuais”. Esta axuda enmárcase na Convocatoria 2019 de axudas a proxectos asistenciais desta fundación privada.
Grazas a esta colaboración, 144 persoas coa síndrome de Down e outras discapacidades intelectuais de 119 centros educativos de toda a Comunidade Autónoma de Galicia contaron cunha serie de apoios encamiñados a alcanzar o maior grao de desenvolvemento e autonomía posible a través da dinamización de experiencias educativas de calidade nos seus anos de escolarización.
O obxectivo principal deste proxecto é promover e facilitar, de forma coordinada cos centros educativos, a inclusión escolar do alumnado con discapacidade intelectual na escola ordinaria, potenciando ao máximo o seu desenvolvemento cognitivo, social e persoal a través de recursos e metodoloxías educativas optimizadoras dos procesos de aprendizaxe.
As limitacións dunha persoa convértense en discapacidade como consecuencia da súa interacción cun ambiente que presenta barreiras e non ofrece apoios para reducir as súas limitacións funcionais. Por tanto, se unha persoa se desenvolve nun ambiente libre de barreiras e cos apoios que necesita, as súas capacidades desenvolveranse máis e serán cada vez máis operativas.
A inclusión na escola ordinaria é a vía e o medio máis adecuado para alcanzar o desenvolvemento persoal, formativo, psicolóxico e social das persoas e, máis especialmente, daquelas que teñen algunha discapacidade. Unha educación inclusiva debe garantir a todo o alumnado o acceso a unha cultura ordinaria que lles achegue unha capacitación e formación básica para a vida. Trátase dunha escola que non pon requisitos de entrada nin mecanismos de selección ou discriminación de ningún tipo, para facer realmente efectivos os dereitos á educación, á igualdade de oportunidades e á participación.
En primeira persoa
Delmiro Prieto, presidente de Down Galicia, e Mila Melio, nai dun mozo coa síndrome de Down escolarizado nunha escola ordinaria, cóntannos a través das seguintes entrevistas, a importancia dunha educación inclusiva.
Accede aquí á entrevista de Delmiro Prieto.
Accede aquí á entrevista de Mila Melio.
Entradas relacionadas
