A Xunta de Galicia vén de publicar no Diario Oficial de Galicia a Orde do 9 de xuño de 2020 pola que se regula a oferta de prazas xuvenís dentro do programa Campaña de verán 2020 e se procede á súa convocatoria.
A Consellería de Política Social, a través da Dirección Xeral de Xuventude, Participación e Voluntariado, organiza estas actividades para facilitar que a mocidade galega poida participar en actividades de tempo libre de calidade.
Quen pode solicitar praza?
Poden solicitar a súa participación nas actividades ofertadas nesta convocatoria as persoas mozas residentes en Galicia, nacidas entre os anos 2002 e 2011.
As persoas que teñan unha discapacidade igual ou superior ao 33% poderán participar nesta convocatoria cumprindo os seguintes requisitos:
- Facer constar a súa condición na epígrafe que figura no seu impreso de solicitude, co fin de planificar os apoios persoais necesarios, se os precisar.
- Que no certificado de recoñecemento de discapacidade non se recolla a necesidade de axuda de terceira persoa.
- Ter capacidade de integración nun grupo e que as súas limitacións e/ou necesidades especiais lles permitan participar e beneficiarse das actividades que se van desenvolver no destino que soliciten.
Que servizos se ofrecen?
As persoas participantes dispoñerán dos seguintes servizos:
- Un programa de actividades de carácter sociocultural, recreativo, formativo e convivencial, que posibilite a participación do mozo ou moza.
- Aloxamento en albergue xuvenil, residencia xuvenil ou campamento xuvenil.
- Manutención en réxime de pensión completa.
- O material necesario para a actividade.
- Un equipo técnico de persoal especializado en animación sociocultural e actividades de tempo libre e actividades náuticas, de ser o caso. Así mesmo, e para o caso das persoas con necesidades especiais que por razón da súa discapacidade precisen apoio, disporase de persoal que conte con formación e experiencia para atender as súas necesidades.
- Atención sanitaria de primeiros auxilios e seguro de accidentes.
As persoas solicitantes con discapacidade que cumpran os requisitos sinalados anteriormente deben optar polo procedemento xeral ou polo procedemento das prazas reservadas para inclusión, de xeito que quedarán excluídas no suposto de que presenten a solicitude por ambos procedementos.
Dende as entidades Down, no marco da defensa da inclusión promovemos a participación das persoas usuarias das nosas entidades nas actividades ordinarias que ofrece a súa contorna.
O prazo de presentación de solicitudes remata o xoves 25 de abril e estas deberán ser presentadas preferentemente por vía electrónica a través da sede electrónica da Xunta de Galicia: https://bit.ly/3d4yfQq
Toda a información sobre a convocatoria desta campaña, a programación de actividades e as características das instalacións de cada campamento está dispoñible na páxina web http://xuventude.xunta.es/