Tendo en conta a crise sanitaria provocada polo COVID-19 e as consecuencias sociais e económicas que esta vai levar consigo no noso país, o papel do Terceiro Sector Social faise aínda máis esencial para miles de persoas. Trátase dun sistema composto por 28.000 entidades cunha actividade que representa o 1,45 % do PIB e que en 2018 xerou máis de 577.000 empregos directos en España. Son estas entidades as que están a contribuír coas súas estruturas e redes á abordaxe das necesidades dos colectivos máis vulnerables para que ninguén quede atrás.
Para defender a acción do Terceiro Sector, o Comité Español de Representantes das persoas con Discapacidade (CERMI) iniciou a campaña #TercerSectorEsencial, xunto á Plataforma do Terceiro Sector (PTS). Desde Down Galicia unímonos a ela para reivindicar a sustentabilidade do Sector Social e a implementación dunhas políticas sociais que garantan os dereitos das persoas con discapacidade e das súas familias.
Tal e como se expresa no argumentario da campaña #TercerSectorEsencial, «cada euro que dediquemos ás políticas sociais que loitan contra a pobreza e a exclusión social e constrúen cohesión social non será un gasto senón un dos mellores investimentos colectivos que podemos facer, non en beneficio duns poucos, senón en beneficio colectivo».
Por iso, sublíñase que «o recoñecemento ao labor do Terceiro Sector Social débese corresponder con garantías económicas e xurídicas para que poidan manter a capacidade de resposta demostrada».
Protección dos dereitos das persoas máis vulnerables
O colectivo formado por persoas en risco de exclusión social, con problemas de saúde ou con discapacidade sufriu con fartura esta pandemia, que ademais, está a xerar graves situacións de vulnerabilidade entre persoas que nunca antes necesitaran axuda.
Por iso, as entidades do Terceiro Sector de Acción Social están a ser esenciais na resposta ás súas necesidades, demostrando a súa capacidade e mobilizando os seus propios recursos, mesmo cando os servizos sociais se viron desbordados.
Nese sentido, desde Down Galicia sumámonos á campaña #TercerSectorEsencial para solicitar ao Estado, Goberno, Comunidades Autónomas e Concellos que recoñezan o papel esencial das entidades do Terceiro Sector de Acción Social e garantan o financiamento necesario para seguir defendendo os dereitos das persoas máis vulnerables que reciben o noso apoio.
Para iso, necesítanse instrumentos estables de financiamento da súa acción social, entre outros co mantemento do tramo estatal da casiña de fins sociais do IRPF, regulando, coa máxima celeridade, o 0,7% do Imposto de Sociedades ou co desenvolvemento da Lei do terceiro sector.
Ademais, débese traballar para deseñar novas vías de financiamento destas organizacións, que brinden a estabilidade e a certeza a un labor tan preciso e sensible.
A estabilidade é imprescindible
A posta en marcha e o mantemento de iniciativas que contribúen a mellorar a vida das persoas máis vulnerables e a defensa dos seus dereitos require, inevitablemente, de planificación e organización. Non podemos seguir traballando desde a incerteza e o temor de que as iniciativas que se necesitan poidan manterse no tempo, co dano que iso produce tanto a persoas beneficiarias como a traballadores e traballadoras.
En definitiva, o Sector de Acción Social convértese nun motor esencial para un modelo de reactivación social e económica que non deixe atrás ás persoas máis vulnerables e que aposte por un novo modelo de desenvolvemento inclusivo e, por iso, solicitamos ao Goberno de España unha resposta eficaz e con efecto inmediato.