Guías en lectura fácil sobre o proceso electoral, información máis comprensible dos programas dos diferentes partidos ou claridade á hora de informar sobre a mesa que corresponde a cada votante son algunhas das reclamas que as persoas usuarias das entidades Down de Galicia poñen enriba da mesa antes das vindeiras eleccións autonómicas do mes de xullo.

Estas peticións extráense do “Informe sobre a experiencia das persoas usuarias das entidades Down nas eleccións xerais de 2019”, elaborado pola Federación Down Galicia tralos comicios estatais de abril do pasado ano e baseado na resposta de 165 persoas coa síndrome de Down e outras discapacidades intelectuais de entre 18 e 60 anos.

Este informe, que tamén recolle a recuperación do dereito a voto do 34% das persoas enquisadas tras a reforma da Lei Orgánica do Réxime Electoral Xeral, deixa patente que moitos e moitas das que acudiron a votar precisaron apoios previos para poder facelo, mais gustaríalles contar con materiais accesibles que lles permitisen facelo de xeito autónomo.

O artigo 9 da Convención sobre os dereitos das persoas con discapacidade da ONU, ratificada por España en 2008, di: “A fin de que as persoas con discapacidade poidan vivir en forma independente e participar plenamente en todos os aspectos da vida, os Estados Partes adoptarán medidas pertinentes para asegurar o acceso das persoas con discapacidade, en igualdade de condicións coas demais, ao entorno físico, o transporte, a información e as comunicacións, incluídos os sistemas e as tecnoloxías da información e as comunicacións, e a outros servizos e instalacións abertos ao público ou de uso público, tanto en zonas urbanas como rurais”.

Queda claro, polo tanto, que o acceso á lectura e á información é un dereito e unha necesidade social.

Que é a lectura fácil?

A lectura fácil é a metodoloxía que se utiliza para facilitar o acceso á información a todas aquelas persoas que teñen unha capacidade de comprensión lectora máis baixa. Trátase de redactar a información con frases sinxelas, curtas e directas, de forma que poida ser entendida por persoas con discapacidade cognitiva ou discapacidade intelectual. Non se trata de eliminar información, senón de facela máis comprensible.

Deste xeito, contribúese á autonomía persoal e á inclusión social das persoas con dificultades lectoras, facilitando así a accesibilidade á información e eliminando as barreiras para a participación.

É necesario un maior impulso e concienciación sobre o uso da lectura fácil para avanzar de xeito real cara a inclusión social de toda a cidadanía, posto que unha sociedade inclusiva de verdade deber facilitar que todos os seus membros poidan acceder a todas as áreas de coñecemento e participación.