Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
A Xunta de Galicia, a través da Consellería de Economía, Emprego e Industria, facilitou a contratación na Federación Down Galicia de tres persoas desempregadas acollidas ó programa de Garantía Xuvenil. Esta axuda estivo cofinanciada nun 91,89% polo Fondo Social Europeo e a Iniciativa de Emprego Xuvenil, a través do Programa Operativo de Emprego Xuvenil.
A achega, que ascende aos 39.248,65€, empregouse para sufragar os custos salariais das tres persoas contratadas e a súa cotización á Seguridade Social a xornada completa durante 7 meses.
As novas traballadoras desempeñaron as súas funcións como axente de desenvolvemento social, formadora para o emprego e analista de xestión e organización nos centros de traballo que Down Galicia ten en Pontevedra e Santiago de Compostela, respectivamente.
Este proxecto céntrase, por unha banda, na avaliación, seguimento e intervención no proceso de envellecemento e asesoramento a familias, apoiando a promoción do envellecemento activo das persoas coa síndrome de Down e outras discapacidades intelectuais, asegurándolles maiores oportunidades de incrementar, manter e actualizar aquelas competencias que fomenten a súa independencia e autonomía persoal.
Por outra banda, pon o foco no desenvolvemento de tarefas de formación práctica en empresa para persoas con discapacidade intelectual, formando ás persoas coa síndrome de Down e outras discapacidades intelectuais, facilitando a consecución das maiores cotas de autonomía posibles para a súa participación na sociedade como membros de pleno dereito, e dotándoas dos instrumentos necesarios para ampliar a súa formación técnica e mellorar así as súas posibilidades de inserción laboral.
Por último, tamén se centra na xestión das ferramentas utilizadas para o manexo de datos das actividades de Down Galicia e da formación bonificada a profesionais, co obxectivo de traballar cos datos necesarios para ofrecer ás persoas implicadas nos procesos de inclusión familiar, educativa, laboral e social das persoas con discapacidade unha ferramenta que facilite e garanta unha atención de calidade na prestación do Servizo de Promoción de Autonomía Persoal, así como xestionar o crédito de formación das persoas profesionais.
Entradas relacionadas
