Down Vigo retoma esta semana o lanzamento da colección solidaria Proxecto Xx, composta por 15 camisetas deseñadas coa técnica do ecoprint, en colaboración coa empresa local Las Flores de Greta. Os beneficios da campaña serán doados integramente á ONG Bicos de Papel, asociación de axuda a nenos oncolóxicos e as súas familias. O proxecto presentouse o pasado mes de febreiro no  Concello de Vigo, pero o lanzamento quedou posposto debido á situación de pandemia sanitaria polo COVID-19.

As 15 camisetas, con tecido 100% algodón, foron deseñadas polo alumnado do servizo de Formación de Down Vigo, que participaron no proceso. O resultado son 15 pezas únicas nas que cada participante plasmou os seus desexos e creatividade. Cada peza leva incluído un marcapáxinas no que se conta a historia de cada deseño.

As persoas interesadas en colaborar nesta iniciativa poderán tamén conseguir mochilas e bolsos doados por Las Flores de Greta (21 unidades), así como 15 postais personalizadas cos estampados das camisetas. Tamén se inclúe como recompensa a posibilidade de participar nunha cata de café privada (10 persoas) co barista Marcos González, campión de España  Barista 2019.

Todos os produtos serán postos ao dispor do público mediante a plataforma ULULE de crowdfunding ou micromecenazgo. Desta maneira, todas as persoas que queiran poderán realizar unha achega a través de doazóns económicas obtendo a cambio unha ou varias recompensas. O importe íntegro da recadación será doado á ONG  Bicos de Papel.

A idea central do proxecto é agradecer á sociedade toda a axuda prestada durante os 30 anos da entidade, tomando esta vez a iniciativa de axudar a outra entidade social. Para iso, Down Vigo conta coa colaboración de Las flores de Greta, tres emprendedoras viguesas que se dedican ao deseño de pezas de roupa coa técnica do ecoprint.

Colabora co proxecto e consegue a túa camiseta a través deste enlace.