A pasada semana, Down Coruña e o Concello de A Coruña asinaron o convenio polo que a administración local cede á entidade social o quiosco situado na praza de Ourense para o desenvolvemento do proxecto “Down Café”. Na sinatura do acordo estiveron presentes a alcaldesa, Inés Rey e o presidente e o vicepresidente da xunta directiva de Down Coruña, Ricardo Santos e Manuel Álvarez.
“Down Café” ten por obxectivo a creación dun local de restauración, onde nove persoas con e sen discapacidade amosarán os coñecementos propios da profesión de barista e traballarán ofrecendo cafés para levar a todas as persoas que ata alí se acheguen.
A iniciativa, cuxa previsión de apertura se espera para este mes de outubro, unha vez finalizadas as reformas, foi descrita por Inés Rey, “como unha das máis bonitas que vou poder presentar durante o meu mandato” e salienta a súa transcendencia, xa que supón “unha aposta pola integración e pola igualdade de oportunidades”.
Reforma mínima
O presidente de Down Coruña, Ricardo Santos, cualificou a praza de Ourense como unha “contorna privilexiada” e indicou que “unha vez realizados os trámites e levada a cabo a reforma mínima” tratarán de poñer en marcha o proxecto canto antes. “Poderemos retornar a gozar na Coruña dun espazo que esperemos que nos poida dar unha alegría”.
Trátase dunha iniciativa pioneira en Galicia, pero para levala a cabo precisan un investimento que están a buscar nestes momentos. Unha vez comecen a marchar as cousas, esperan que Down Café arroxe beneficios e que “amose que as persoas coa síndrome de Down e outras capacidades intelectuais tamén poden emprender”.
