Teima Down Ferrol e Down Pontevedra Xuntos asinaron nos últimos días senllos convenios de colaboración coas súas administracións locais de referencia para o desenvolvemento das súas actividades.

Deste xeito, o Concello de Ferrol achegará 35.000€ a Teima co obxecto de promover a inclusión na vida adulta de aproximadamente 60 persoas usuarias que forman parte da entidade Down. Esta achega forma parte do anexo de subvencións nominativas da administración ferrolá para este exercicio, aprobada polo pleno municipal o pasado 27 de abril.

Trala sinatura do convenio, o alcalde da cidade, Ángel Mato, agradeceu á presidenta de Teima o labor a prol da inclusión que a entidade leva a cabo dende hai máis de 25 anos, destacando o seu apoio na inserción laboral das persoas coa síndrome de Down e outras discapacidades intelectuais e o seu intenso traballo social.

Pola súa parte, a presidenta de Teima, Patricia Serantes, agradeceu ao concello o apoio continuado ao traballo da entidade e, en particular, a achega económica obxecto do convenio, coa que se poderá avanzar no fomento e a mellora da autonomía do colectivo.

Novo convenio de colaboración con Xuntos

O Concello de Pontevedra, na xunta do goberno local celebrada o pasado luns, aprobou o convenio anual entre a concellería de Benestar Social e Down Pontevedra Xuntos, que ten por obxecto contribuír ao desenvolvemento do programa de inclusión educativa e a promoción da autonomía das persoas coa síndrome de Down e outras discapacidades intelectuais.

Este acordo, que o concello leva asinando coa entidade Down desde o ano 2003, concrétase nunha achega de 9.000€ que permitirán levar a cabo diversas actividades destinadas a mellorar as competencias e capacidades das persoas usuarias con idades comprendidas entre os 3 e os 21 anos e que están escolarizadas dentro do sistema educativo regrado.

O tenente de alcalde e responsable da área de Benestar Social, Tino Fernández, destaca “a fundamental función social que Xuntos efectúa neste concello”, que beneficia a un importante número de persoas coa síndrome de Down e outras discapacidades intelectuais que requiren servizos de apoio para a mellora da súa calidade de vida.