A través das subvencións destinadas ao desenvolvemento de proxectos de asesoramento e formación de persoas con discapacidade na Comunidade Autónoma de Galicia, a Consellería de Política Social financiou parte das cinco accións formativas levadas a cabo por Down Galicia entre 2019 e 2020. Estas actuacións, das que puideron beneficiarse 137 persoas usuarias das distintas entidades Down de Galicia, contaron cun financiamento total de 122.900,82€ para a súa realización e están cofinanciadas polo Fondo Social Europeo no marco do programa operativo FSE Galicia 2014-2020.
O primeiro deles centrouse na preparación de oposicións autonómicas e estatais e tivo como principal obxectivo garantir ás persoas participantes a adquisición e mellora das competencias necesarias para presentarse a un proceso de oposición e superalo con éxito.
O segundo tiña por obxecto mellorar a alfabetización e exercitar as habilidades instrumentais básicas das persoas participantes, o que lles permitirá unha maior competencia social á hora de desenvolverse de maneira autónoma en actividades da súa vida cotiá.
O terceiro proxecto tiña como obxectivo a estimulación cognitiva das persoas coa síndrome de Down e outras discapacidades intelectuais, para mellorar e exercitar as funcións cognitivas nas persoas participantes como base para lograr unha mellora da autonomía, as habilidades prelaborais e da súa participación na comunidade.
Estes tres proxectos leváronse a cabo entre o 01 de xullo de 2019 e o 30 de xuño de 2020.
Finalmente, o cuarto e quinto proxecto centrábanse na especialización formativa. Desta maneira, un estaba enfocado á adquisición de competencias no ámbito da restauración (execución do 07/01/2020 ao 30/06/2020), mentres o outro faría o seu co perfil profesional de persoal de servizos xerais (execución do 01/02/2020 ao 30/04/2020).
Desde o mes de marzo de 2020, como consecuencia da declaración do estado de alarma pola crise sanitaria do COVID-19, a atención ás persoas participantes, que estaba formulada principalmente con carácter presencial, tivo que ser impartida a distancia a través do teletraballo e de diferentes medios telemáticos, conseguindo igualmente uns grandes resultados.