Down Vigo expón na sede da Deputación de Pontevedra os tapices da colección “El viaje de mi vida”
O alcalde de Santiago, Xosé Sánchez Bugallo, acompañado pola concelleira de Políticas Sociais, Mila Castro, asinou esta mañá os convenios de colaboración para o 2020 coa Fundación Down Compostela, o Colexio de Avogados, Cáritas, Cociña Económica e a Fundación Secretariado Xitano. Estes acordos de colaboración financian diversas actividades realizadas ou a realizar neste ano 2020.
O convenio, asinado no Pazo de Raxoi polo presidente de Down Compostela, Juan Martínez, ascende a 10.498,00 euros e financiará o proxecto de vida independente “Isto é vida”. Este programa non está formulado como un recurso do que a persoa beneficiaria vaia facer uso toda a vida, senón que está deseñado para capacitar ás persoas coa síndrome de Down ou discapacidade intelectual para vivir no seu propio fogar, para planificar o seu futuro e para realizar os seus proxectos de vida.
Actualmente, as persoas usuarias da entidade Down participan en estancias curtas nunha vivenda que xeran experiencias de vida independente, na que o grupo é o encargado de establecer unhas normas de convivencia baseadas no respecto e na participación activa dentro do fogar e a contorna comunitaria.
As estancias consisten en estratexias planificadas de aprendizaxe e capacitación en autonomía e vida independente. Estas estadías teñen lugar entre semana, de luns a venres durante todo o ano, aínda que tamén se deseñan e desenvolven estancias nocturnas, durante a fin de semana.
O desenvolvemento das actividades ten lugar nunha vivenda do barrio compostelá de Fontiñas (cedido polo IGVS da Xunta de Galicia), onde as persoas usuarias levan a cabo as diferentes tarefas domésticas que a xestión dun fogar require. Deste xeito, e sempre coa supervisión e apoio do persoal da Fundación Down Compostela, acádanse, grazas á colaboración entre participantes, familias e profesionais, os obxectivos para os que naceu este proxecto.
Entradas relacionadas
