Tras uns meses de espera pola situación xerada pola COVID-19, Carmen Brage Eibe, unha muller con discapacidade intelectual membro de Teima Down Ferrol, asinou por fin esta mañá o contrato que a converte en funcionaria do Servicio Galego de Saúde. Nunhas semanas comezará a súa andaina como celadora no Complexo Hospitalario Universitario de Ferrol tras conseguir unha das melloras notas no concurso-oposición convocado en 2018 pola administración autonómica e celebrado a comezos do pasado ano.

Nun acto presidido polo xerente da área sanitaria de Ferrol, Ángel Facio Villanueva, un pequeno grupo composto por algunhas das persoas que acadaron as prazas ofertadas pola Xunta de Galicia, reservadas en exclusiva para persoas con discapacidade intelectual, tomaron posesión das mesmas tras presentar a documentación requirida e elixir a praza desexada.

Carmen, que se amosa “moi contenta e con moitas ganas de empezar”, comezou a preparase hai dous anos e, aínda que ao principio tiña as súas dúbidas de se podería superar un proceso selectivo destas características, con constancia e traballo demostrou que era totalmente capaz. Durante meses, co esforzo por bandeira, Carmen dedicou moitas horas do seu día a día ao estudo desta oposición.

“Aínda non mo creo, ata que comece e me vexa no allo…”, comenta con felicidade. “Non o esperaba, porque todo o mundo dicía que había xente que levaba preparándose 7 ou 8 anos, pero despois de facer o primeiro exame vin que tiña posibilidades”.

Marta Álvarez, responsable da área de emprego e formación de Teima Down Ferrol, salienta “o esforzo das persoas coa síndrome de Down e outras discapacidades intelectuais na preparación destes procesos selectivos, xa que, na sociedade actual, dispoñer dun emprego é un principio fundamental, tanto para a inclusión social da persoa como para o desenvolvemento da súa personalidade e a súa autoestima”.

No acto, que tivo lugar no salón de actos do Hospital Arquitecto Marcide da cidade ferrolá, tamén participaron Francisco Martínez Otero, Director de Recursos Humanos da área sanitaria de Ferrol, e Pablo Piñeiro, responsable de celadores.

Cada ano son máis as persoas usuarias de entidades Down interesadas en conseguir unha praza nalgunha das ofertas de emprego público convocadas. Todas elas pasan meses, ou incluso anos, preparándose e esforzándose ao máximo, evidenciando deste xeito o interese do colectivo pola súa entrada ao mercado laboral.

O acceso ó emprego público para as persoas con discapacidade intelectual en xeral, e coa síndrome de Down, en particular, é unha das reivindicacións históricas da Federación Down Galicia e as súas entidades membro.