Dúas mozas do Movemento Down Galicia poñen voz a ‘Valentina’, a protagonista da película de animación nomeada aos Premios Goya
‘Hasta la vista’ pecha a súa primeira tempada con Carlota e o Camiño Francés como protagonistas. Para este episodio tan especial, o equipo de produción de ‘Hasta la vista’ púxose en contacto coa organización de Down Compostela, que propuxo a Carlota para representar á Fundación. Co espírito aventureiro que lle caracteriza, aceptou sen dubidalo nin un segundo e pediu uns días libres na empresa para a que actualmente traballa informatizando datos. Por diante esperáballe unha experiencia inesquecible.
A protagonista do último capítulo da primeira tempada de ‘Hasta la vista’ é vital, gústalle moito bailar, ir ao cinema, pasear e é unha namorada da música: Café Quijano, Sergio Dalma, Andy e Lucas, Chayanne… Pero o que máis lle gusta é viaxar. VIAXAR, así, en maiúsculas; como se di coloquialmente, “apúntase a todo”. “A pesar da dor de pés, foi unha experiencia incrible”, aseguraba Carlota á súa chegada á Praza do Obradoiro. Durante o Camiño, a natureza converteuse na súa mellor compañeira contra a soidade.
A webserie, conformada por oito capítulos, móstranos os diferentes roteiros do Camiño de Santiago a través da mirada de diferentes peregrinos. Nacionais e internacionais; en bicicleta, por mar ou acompañados polos seus cans, a plataforma combina información dos diferentes roteiros e as experiencias máis persoais daqueles que os percorreron.
Un Camiño inclusivo
‘Hasta la Vista’ tivo, durante a súa primeira tempada, unha mirada global. O obxectivo da cámara acompañou a diferentes peregrinos que nos contaron as súas historias máis persoais. As de todos, sen excepción. O enfoque inclusivo na webserie non podía faltar, porque non relataría na súa plenitude todas as experiencias que se viven en cada unha dos roteiros, que sobordan espírito de superación. Así se reflectía no capítulo 6, onde Julia, Roberto e Dani percorrían o Camiño Portugués pola costa, demostrándonos que se poden superar todas as dificultades. Utilizando unha barra direccional, Roberto, invidente, sentía a seguridade de percorrer o roteiro acompañado, pero coa liberdade de movementos que non lle permitiría ir da man doutra persoa.
Segunda tempada
Desde o primeiro episodio, no que Paco percorría a Vía da Prata para terminar desvelándonos ante a Catedral o segredo que lle levou a facer esta peregrinaxe, ata este último no que Carlota peregrinaba o Camiño Francés cun continuo sorriso na boca, os episodios puxéronnos os pelos de punta.
O listón está moi alto, pero ‘Hasta la vista’ xa está a preparar a súa segunda tempada. A nova entrega promete moitas sorpresas, pero polo momento só poden adiantarnos que todos os camiños levan… a Roma.
Entradas relacionadas
