O atleta Marcos Groba completou o pasado 17 de outubro o seu particular reto solidario, consistente en realizar 115 quilómetros do Camiño de Santiago co obxectivo de recadar fondos a beneficio de Down Vigo.
A iniciativa xurdiu por mor da cancelación das competicións deportivas pola actual situación sanitaria, entre as que te atopa a carreira 6 horas Vila do Corpus, coa que Marcos e o seu equipo, Taninos Runners Ponteareas, recadan cada ano fondos que doan á entidade. En total, a recadación doada a Down Vigo ascende a 625 euros, suma do obxectivo conseguido polo atleta e as achegas do resto do equipo.
Nesta ocasión, o reto de Marcos Groba consistiu en completar correndo os 115 quilómetros que separan a Catedral de Tui da Catedral de Santiago de Compostela en menos de 11 horas. Para iso, contou durante o traxecto coa axuda dos seus compañeiros de equipo, que ou ben o acompañaron durante certos tramos (correndo ou en bicicleta) ou ben se encargaron de cuestións como o aprovisionamento ou a asistencia sanitaria.
Para poder completar o reto, Marcos estivo a se preparar durante dous meses e medio xunto ao seu adestrador, Pedro Nimo. Como el mesmo explica, “a decisión de levar a cabo este reto débese a que, ante a situación actual que estamos a sufrir e a imposibilidade de poder competir, un día decidín marcarme este reto, xa que ao final cada un compite contra si mesmo. Ademais, como este ano non se puido celebrar a carreira 6 Horas Vila do Corpus, ocorréusenos que podiamos colaborar con Down Vigo desta forma”.