A sociedade científica Trisomy 21 Research Society (T21RS) continúa a investigación internacional sobre os efectos da COVID-19 nas persoas coa síndrome de Down. É o estudo máis extenso e completo deste tipo, no que se recolleron máis de 1000 casos de persoas coa síndrome de Down de todo o mundo. Os casos foron reportados por familias e por profesionais clínicos, recolléndose así toda a información dispoñible sobre as condicións de vida das persoas, posibles enfermidades preexistentes e curso da enfermidade.

Os resultados do estudo ata o momento, indican que as persoas coa síndrome de Down son un grupo moi heteroxéneo ante a enfermidade por COVID-19, cuxos factores de risco ante os resultados máis graves (hospitalización e falecemento) son similares aos da poboación xeral.

Entre eles atopamos a idade, a diabetes, a obesidade ou o sexo masculino, ademais de enfermidades cardíacas conxénitas, como factor de risco de hospitalización en persoas coa síndrome de Down. Con todo, é fundamental sinalar que, mentres que na poboación xeral o risco de resultados desfavorables ante a COVID-19 aumenta a partir de ao redor dos 60 anos, nas persoas coa síndrome de Down acentúase despois dos 40 anos (estímase que unha persoa coa síndrome de Down de 50 anos, asemellaríase en termos médicos ante a COVID a unha persoa de 80-85 anos sen síndrome de Down).

Por tanto, en base aos resultados deste estudo internacional, non podemos considerar ás persoas coa síndrome de Down menores de 40 anos como grupo extremadamente vulnerable polo feito de ter síndrome de Down, agás se padecen patoloxías previas de risco que lles inclúan dentro dos grupos vulnerables, como son as de obesidade, epilepsia ou demencia.

Por este motivo, e de igual maneira que ocorre coas orientacións cara á poboación xeral, recoméndase a todas as persoas con síndrome de Down evitar os comportamentos de risco e adoptar as precaucións necesarias para reducir a propagación da infección, como lavarse as mans frecuente e minuciosamente, o distanciamento social, o uso de máscara e a garantía de que as vacinacións recomendadas e os controis sanitarios estean ao día.

Para os maiores de 40 anos, aconséllase encarecidamente o bo uso da máscara, evitar as estancias prolongadas en espazos interiores ou non ventilados, a vacina da gripe estacional e neumocócica, así como manter un bo nivel de vitamina D (a través dunha alimentación saudable, contacto co exterior, toma de sol natural e suplemento vitamínico se fose necesario). Seguindo estas recomendacións, as condicións de risco redúcense e é moito máis probable evitar os contaxios e as complicacións que poden producirse ante a enfermidade.

Estudo de COVID-19 e síndrome de Down, informe do 24 de xullo de 2020, dispoñible facendo click aquí.

Estudo internacional sobre o impacto da COVID-19 en persoas con síndrome de Down de T21RS, dispoñible facendo click aquí.