Esta fin de semana –20 e 21 de novembro– terá lugar unha das citas anuais máis importantes para todo o colectivo da síndrome de Down en España: o XX Encontro de Familias de Persoas coa síndrome de Down. Esta edición perde por primeira vez a súa dimensión “nacional” e será o noso primeiro encontro internacional de familias, xa que poderán asistir persoas de calquera lugar do mundo grazas a que será 100% virtual. Ademais, tendo en conta a complicada situación económica pola que atravesan moitas familias, Down España decidiu que a inscrición ao encontro sexa por primeira vez gratuíta, e, desa forma, que ningunha persoa quede fóra, e máis aínda aquelas que máis o necesitan. Como sempre, a edición deste ano tamén será unha gran oportunidade repleta de debates, actividades para o intercambio de experiencias e conferencias sobre diferentes áreas relacionadas coa síndrome de Down. Esperámosvos!!
Acto inaugural do Encontro
Este venres 20 de novembro ás 19:00 h (hora peninsular de España), terá lugar o acto inaugural deste evento tan esperado, que xa xerou un enorme interese tanto en España como en América Latina e entre familias de fala hispana situadas en Estados Unidos e outros países do mundo.
O acto de inauguración será conducido pola popular xornalista e presentadora de informativos, Lourdes Maldonado e nel poderemos gozar, entre outras cousas, dunha actuación estelar do actor e humorista Santi Rodríguez, coñecido para o gran público polos seus papeis en «7 vidas» e «Gym Tony», entre outros. Tamén poderemos asistir a unha incrible actuación da compañía inclusiva de danza Psicoballet de Maite León.
Sábado, 21 de novembro
Durante a xornada seguinte –sábado 21 de novembro-, as persoas asistentes ao encontro terán a posibilidade de asistir a sesións formativas e debates conducidos por relatores e relatoras de máximo nivel sobre cuestións vitais para o colectivo como: os retos actuais que enfronta a síndrome de Down; o cambio cara a un novo modelo de vida adulta e envellecemento, e a situación das mulleres coa síndrome de Down hoxe.
Doutra banda, a recoñecida coach e psicóloga da Voz Kids, Paz Gómez Ferrer, ofrecerá unha sesión cargada de vitalidade e optimismo co obxectivo de axudarnos a xestionar as nosas emocións nestes difíciles momentos que nos está tocando vivir pola pandemia de COVID-19. Ademais do programa formativo, as familias poderán gozar de varias actividades como unha visita guiada a Caixa Fórum e outras sorpresas que contan coa participación de Javier Fernández, campión olímpico, bicampión do mundo e sete veces campión de Europa de patinaxe artística sobre xeo e de Antonio Najarro, bailarín, coreógrafo e director do Ballet Nacional de España (2011-2019).
Un programa completo de actividades lúdicas e formativas que non vos podedes perder!
Inscricións
O proceso de inscrición realizarase a través desta ligazón (pica na ligazón para inscribirte): Inscrición ao XX Encontro de Familias de DOWN ESPAÑA
Unha vez rexistrada, cada familia recibirá un correo electrónico confirmando a inscrición e no prazo duns días, outro correo no que se indica ligazón á aplicación web que creou Down España con toda a información do Encontro de Familias: programa, vídeos, acceso ás conferencias e debates, imaxes… Ademais, haberá un apartado para dúbidas, suxestións ou para intercambiar experiencias e comentarios facilitando así a interacción entre familias.
Para a celebración deste evento virtual tan especial, contamos co apoio do Ministerio de Dereitos Sociais e Axenda 2030, de Fundación ONCE e Fundación la Caixa.
